三浦知良返國即操　笑說相會艾斯派拿

三浦知良喺禮拜二去俄羅斯同日本隊助威之後，尋日一朝早就返到日本，一落機就立即趕返去橫濱上星川訓練基地，準備橫濱FC禮拜日對甲府風林嘅J2賽事，報道話Kazu仲練足個半鐘，完全冇畀藉口自己偷懶。
Kazu一落機就自然有大批記者走去機場接機，佢就同大家分享返俄羅斯之旅嘅趣事。Kazu話果時佢同哥倫比亞名宿艾斯派拿喺貴賓席相會，由於Kazu喺1994-95年球季效力熱拿亞果時，艾斯派拿就踢緊帕爾馬，所以佢哋廿幾年前已經有相交。Kazu透露大家閒話家常之外，仲傾返當年一齊去米蘭落disco玩嘅往事。艾斯派拿後來話不如睇完波之後一齊落bar飲返幾杯，Kazu就話球季仲進行緊所以耍手擰頭，艾斯派拿聽完之後就話「吓乜你仲踢緊架﹖」，搞到Kazu無奈苦笑咁話「係呀」。

講返場比賽，Kazu就話香川真司主射果球12碼，可以話係日本足球史上最有壓力嘅12碼，射之前搞到Kazu自己都睇到好緊張。Kazu認為賽前外界彈到日本隊一文不值，贏咗之後輿論就變哂，所以禮拜日晚對塞內加爾一戰，就係日本隊正式為自己正名嘅機會。佢認為日本絕對有機會擊敗塞內加爾，不過就要好好部署，特別係要花心思應付比賽最後30分鐘。

#三浦知良 #カズ #Ｗ杯

圖片：スポニチ
資料來源：J League情報站
https://www.facebook.com/jleagueinfo