日本變陣4-4-2爭出線　長友話食咗仙豆充滿力量

6月28日（四）　22：00　日本VS波蘭　now618/619/フジテレビ直播
日本隊喺今屆世界盃決賽周頭2場波面對強敵哥倫比亞同塞內加爾，喺外界睇淡之下取得1勝1和，只要今晚對波蘭保不敗，就可以繼2010年之後再次殺入16強。不過隊長長谷部誠強調日本唔係求和隊，亦唔敢睇少波蘭，縱然對手已經出局亦係強隊，所以今場波一定努力爭勝。外界預計日本今場會作出若干輪換，表現優異嘅乾貴士同隊長長谷部誠會休息，亦嘗試用雙箭頭陣式爭勝。


日本媒體就近日球隊練波消息預測，由於戰程頻密，所以今場應該會作出多個位置輪換，特別係想試吓畀34歲嘅長谷部誠唞吓，以及換走頭兩場波都犯下嚴重失誤直接令球隊失波嘅門將川島永嗣。至於長友佑都日前就再用《龍珠》嚟講笑，話球隊已經食咗仙豆，所以呢兩場波先咁有力量。至於咩係仙豆﹖長友話咪就係外界對佢哋嘅質疑囉。日本隊踢完之前兩場之後，外界恐怕都唔會再質疑佢哋，咁到底仲有冇仙豆食呢﹖

縱然未必再有外界質疑令日本隊發奮，日本隊鬥志相信都唔會差得去邊。而且日本隊喺往績上都有優勢，以往2次友賽波蘭都贏波，仲要入7球冇失波。相反波蘭唯一喺世界盃對亞洲球隊係2002年輸畀韓國，近10場決賽周賽事都有失波，夾埋失成23球。再者今場波對波蘭嚟講只係名譽戰，佢哋喺上場輸畀哥倫比亞後段都已經出現軍心渙散，今場仲有幾多戰意實在係疑問。所以縱然日本近5次喺世界盃對歐洲球隊，只有喺2010年贏丹麥一戰有波入，今場都應該可以坐和望贏入16強。
日本隊預計陣容（4-4-2）：23.中村航輔（GK）；19.酒井宏樹（RB）、22.吉田麻也（CB）、3.昌子源（CB）、5.長友佑都（LB）；21.酒井高德（RM）、7.柴崎岳（CM）、10.香川真司（CM）、11.宇佐美貴史（LM）；13.武藤加紀（FW）、9.岡崎慎司（FW）
後備：1.川島永嗣（GK）、12.東口順昭（GK）；2.植田直通（DF）、4.本田圭佑（MF）、6.遠藤航（DF）、8.原口元氣（MF）、14.乾貴士（MF）、15.大迫勇也（FW）、16.山口螢（MF）、17.長谷部誠（MF）、18.大島僚太（MF）、20.槙野智章（DF）

#日本代表 #W杯 #SAMURAIBLUE #2018FIFAワールドカップ

圖片：スポニチ
資料來源：J League情報站
https://www.facebook.com/jleagueinfo/