偷食可治７年之癢

「偷食可治7年之癢」呢句野唔難理解，想一想點解有「零食」嘅出現，你就會明。我並不認同，但我明白。

時間會沖淡一切，一段關係久了就容易會令人覺得乏味。正印好比正餐，慘在正餐都可以揀粥粉麵飯，正印喺現代社會只能得一個。喂大佬，叫你餐餐食同一樣野，你都厭啦下話？咁點？有好多人就揀咗最能夠直接刺激味蕾嘅方法－食「零食」。正餐之外，食少少零食，心情好啲，身心都平衡啲，咁咪唔使轉另一個正餐囉。呢個係令新鮮感同感情並存嘅偏方。
話明係偏方，唔識食隨時死咗都唔知咩事。最多人犯嘅錯就係食上癮，食到無胃口食正餐，一見到正餐就反胃，咁冇啦，放棄正餐－分手，咁即係零食變正餐啦，咁咪錯晒囉！變咗正餐，仲係零食！？唔係乜野都做到正餐架。到新鮮感冇晒，你就會諗返個正餐，但一切都已經唔係嗰回事，口味嘅嘢，唔係話你想變就變得返。

所以奉勸各位，搵到個啱食嘅正餐，就咪食零食喇，諗下點幫個正餐調下味，又或者斷食一排，小別勝新婚，咪為咗一時嘅新鮮感令自己後悔一世。