一次過可試多款牛肉

元旦假期天氣寒冷，晚市無堂食，一家人在家晚飯唔想整咁多，訂自取火鍋套餐係其中一個選擇，2小時前落 order 就可以，真方便。

616 顧名思義係火鍋專門店，淥一淥就食得，而且係牛肉專家，訂了4人火鍋餐 $568後，早利亞先到街市買黑豚五花、茼蒿、腐竹及豆腐串等配料，再到店子時間剛剛好。打邊爐必買茼蒿，很喜歡它的獨特清香味，又可幫助消脂解膩。

早利亞選了牛骨清湯底，內有數件牛腩及白蘿蔔，淡淡牛骨香帶清甜。牛肉併盤包括羅斯牛側胸肉、牛上肋、橫隔肌、五花趾、牛駝峰、匙柄、肩胛翼板，部位刁鑽，碟頭不大，勝在可以一次過品嘗多種部位。還有扇貝4隻、牛丸、芋絲、金菇、蜂巢豆腐及娃娃菜，麵食有公仔麵及稻庭烏冬，等水滾時仲可以食住炸魚皮先，非常豐富。
茼蒿味辛性平、養脾胃、消痰飲、行肝氣