網購羅宋湯

於Wheatfield X 羅宋湯專門店網購羅宋湯及秘製醃肉包試試，專門店話明主打海派羅宋湯，真空急凍無添加，放冰格可儲存3個月，解凍後連包裝袋放熱水煮5分鐘至熱透即可。早利亞鍾意牛腩羅宋湯，如果唔食牛肉可以選擇豬髀肉版本，一包可供1－2人，十分足料，味道豐富，唔錯噃。另買咗牛扒、雞扒及豬扒試試，總括來說，盒上建議可放焗爐或氣炸，但早利亞還是覺得煎最易控制，而且肉質口感亦比較啱心水，大大塊扒味道則較重口味，牛扒最為遜色，太腍無乜口感。