美食沙漠有驚喜 El Toro

唔想行咁遠係馬鞍山搵食，去咗個靜靜地嘅商場 We Go Mall，由4樓開始慢慢行落嚟，見到呢間餐廳有墨西哥menu幾得意就試試，首先叫咗墨西哥牛肉夾餅 Beef Mexican Taco，軟墨西哥粟米餅，番茄莎莎醬，牛油果醬及酸忌廉，配合惹味的免治牛肉，整體味道配合，開胃美味，用手食有點狼狽，如果有方法食得斯文d 就好啦。

青醬雞肉扁意粉 Linguine Pesto Chicken，新鮮羅勒、蒜頭、松子及初榨橄欖油混合，食嘅時候要用叉再捲一下碟下的醬汁，望見油，但又無油膩感，幾想要塊麵包蘸汁食。
同枱後生仔叫咗一客新西蘭穀飼紐約客牛扒 NZ Grain-fed Striploin (12oz)，呢個係美式牛肉切法，係牛前腰脊肉嘅牛扒，口感結實，脂肪中等，上枱時好香炭燒味，牛扒都幾厚，裡面粉紅無血水，火候拿捏得好，建議蘸少許鹽已可以提升肉嘅香味。

最後嚟到嘅係蒜香檸檬烤雞 Roasted Lemon and Garlic Chicken
半隻雞非常足料，用咗迷迭香、大蒜及檸檬，唔覺檸檬味，有助減低油膩感，雞好大隻，胸肉好厚身但依然好滑，蘸醬汁食比較配合，加埋即炸粗薯條好滿足。

整體餐廳食物質素有驚喜，已經諗埋下次會嚟食咩菜啦，推介～