[英超2016/2017球季 - 11周後的小總結]

2016/17球季英格蘭超級足球聯賽已經進行左接近3個月, 各隊球隊都已經進行左接近1/3的賽事, 各踢左11場, 正當有接近一星期的國際賽期, 我地黎個小總結, 先睇睇聯賽榜形勢:


我地可以分為以下2組:

爭標組: 由第一至第五的球隊只相差6分, 2場賽事已經可以足以改變總個排名:
榜首: 利物浦 - 8勝2和1負的開季成績, 令利物浦能獨自佔據榜首位置, 而且其攻力強勁, 11戰攻入30球, 高普已經成功將多蒙特的進攻足球帶入利物浦, 不過問題出在後防, 始終後防不穩為今季隱憂, 且看高普點改善呢點喇!

第二位: 車路士 - 8勝1和2負, 其實開季車仔已經非常平穩, 不過中間出現幾場小波折既賽事後, 即傳出干地可能被炒, 但其後連勝5場, 夏三世及沙皮更加係狀態火熱, 干地既3-4-3亦重新激活柏度, 似乎呢部車已經重新開動了!第三位: 曼城 - 7勝3和1負, 擁有強大陣容, 而且更有冠軍級教練哥迪奧拿, 開季聯賽6連勝實在驚人, 不過自從被熱剌被不敗身後便進入小低潮, 阿古路更與哥帥有出場意見之爭, 似乎哥帥仍然未適應英超節奏及了解曼城人腳, 各球隊要向曼城身上搶分係呢D時候喇!

第四位: 阿仙奴 - 7勝3和1負, 開季脫腳反而令阿仙奴其後錄得聯賽6連勝佳績, 而且禾仔及奧燒今季著晒火, 一旦山齊士重新開動其入球能力, 加上銀河唯一基奧特既高空優勢, 阿仙奴絕對係爭標之列, 但首先雲格要放棄其最佳位置之執著..........
第五位: 熱刺 - 5勝6和0負, 目前仍然可以保持不敗既球隊, 但可以留意到, 不敗係無用架, 因為和波失分太多喇, 而且今季熱刺既攻擊力相比上季似乎較為失色, 幸好防守力強勁下, 仍保不敗, 希望哈利簡尼復出後, 可以重新再場場刷入球啦!

護級組: 榜尾2隊同得5分, 其後便已經係10分了, 我地就睇睇邊幾隊最有機會下季英冠見啦!
第十八位: 侯城 - 開季係威係勢, 連贏2場, 不過之後就現晒形喇, 其後8場只得1和7負既成績, 幸好剛剛主場贏到聖人修咸頓, 下場作客新特蘭, 護級大戰一觸即發, 主將史度加斯係關鍵球員。
第十九位: 史雲斯 - 1勝2和8負, 開季第一場即作客擊敗般尼後便無以為繼, 領隊古度連都因而被炒, 觀乎史雲斯賽事, 其實入到波, 不過失波就更多, 似乎只上任4場既新領隊比列有排執喇!
第二十位: 新特蘭 - 1勝2和8負, 同上季維拉有雷同之處, 隊隊都拎到分, 或者般利矛夫抽生死籤輸左, 終於俾新特蘭贏番場, 保住莫耶斯既帥位, 但似乎都命不久已!

咁..........曼聯呢? 摩連奴呢? 伊巴呢?.......俾D時間啦, 向第六位努力緊喇!

K波

鐘意睇我K波講野, 都讚好我個FACEBOOK專頁, 謝謝支持!
https://www.facebook.com/KBALLSTORY