[2016/17歐聯8強正式開戰 - 多蒙特 V 摩納哥 及 祖雲達斯 V 巴塞隆拿]
2016/17球季的歐聯8強戰再度展開:
[2016/17歐聯8強之小回顧]
今晚首先有2場大戰展開:
多蒙特 V 摩納哥
開場時間: 4月11日 ( 4月12日凌晨2:45 )
多蒙特:
16強晉級過程: 2回合計以4:1擊敗賓菲加晉級, 將主客優勢盡現的賽事, 首回合賓菲加主場贏1:0, 次回合多蒙特主場4:0反壓對手過關, 其中奧巴美揚大演帽子戲法!
近況: 現處德甲第四位, 距離第五位有7分之多, 餘下10周, 相信前四席位肯定有, 但冠軍又爭唔到 ( 落後拜仁18分 ), 只係睇下排第幾! 咁既情況下, 精力緊係集中向歐聯啦! 雖然周六晚先被拜仁炒4:1, 但最緊要無傷兵增加, 不過香川上陣成疑, 仲有萊斯同葛斯都應該要避陣, 幸好多仔勁就勁在係咁有新人上位, 19歲法國新仔丹比利表現極好, 只要奧巴美揚生生性性, 唔好再浪費機會, 首回合要領先而回就問題不大啦!
摩納哥
16強晉級過程: 2回合計以6:6擊敗曼城晉級, 首回合由老虎法卡奧發威拿下3球作客入球, 即使次回合主場缺陣下, 也令球隊以3:1勝出曼城後, 憑作客入球優惠晉級!
近況: 現處法甲第一位, 不過被PSG窮追只得3分距離, 餘下7場變成場場都要搏! 不過歐聯賽場又點會放棄, 而今季摩納哥其實勁就勁在攻力強大, 即使曼城都被佢攻入共6球之多! 法卡奧加麥巴比似乎已成為入球指標, 加上中場有22歲中場施華及摩天奴領軍! 攻力唔成問題, 不過防守力都係淘汰賽重要一環, 摩納哥入波多, 其實失波都唔少, 要小心留意喇!
K波預估賽果: 多蒙特 V 摩納哥 - 3:1
祖雲達斯 V 巴塞隆拿
開場時間: 4月11日 ( 4月12日凌晨2:45 )
祖雲達斯
16強晉級過程: 2回合計以3:0擊敗波圖晉級, 保方及卡斯拿斯的對決倒數戰成焦點, 不過祖記明顯實力高過波圖下輕鬆過關!
近況: 現處意甲第一位, 領先第二位既羅馬6分之多, 而且祖記一向穩定, 相信意甲都係今季囊中物, 戴巴拿與希古恩, 呢對阿根廷藉既意甲鋒線攻力強大, 加上中場德國球員基迪拉領軍, 配上古亞達度側擊力, 唔好忘記仲有後防線上既邦路斯, 基亞連尼同埋鋼門保方! 今仗主場, 入波之餘緊係要保住後方啦!
巴塞隆拿
16強晉級過程: 2回合計以6:5擊敗PSG晉級, 其中首回合巴塞作客PSG被炒4:0, 次回合奇蹟於完場前10分鐘內連入3球反勝!
近況: 現處西甲第二位, 落後皇馬3分但打多一場, 而且仲有尼馬剛領紅, 下場聯賽肯定被停賽, 有傳隨時4月尾既國家打比都踢唔到, 加上今季巴塞狀態非常不穩定, 不如搏下歐聯仲實際! 攻擊主力仍然係MSN三子, 可惜巴塞今季中場能力下降, 始終小白年紀不輕, 未有一名具同等級數既中場球員來接班, 加上後防一向有點不穩定, 面對祖記以逸待勞, 失波都唔出奇, 希望入到作客入球返主場再鬥過!
K波預估賽果: 祖雲達斯 V 巴塞隆拿 - 2:2
K波
鐘意睇我K波講野, 都讚好我個FACEBOOK專頁, 謝謝支持!https://www.facebook.com/KBALLSTORY