《警犬巴打》鍾嘉欣又不斷講英文，網民：好煩！

鍾嘉欣算是TVB煩膠之一。雖然淨講把聲可能未必夠「鷄汁May」和「蔡思達」咁煩，但衰在老是常出現，無份演的劇集，主題曲／插曲一樣有她，例如《東坡家事》、《張保仔》等等。最近年初二啟播的《警犬巴打》，鍾嘉欣再玩《點解阿Sir係阿Sir》的Miss Cool，飾演外表口吻cool 到爆的獸醫，例如第2集超市和cafe 串爆「馬子妮」。不過她一對住狗隻就出事，因為用煩聲不斷講英文："goodboy"、"come on"、"yeah"、"no"、"so proud of you"……令部分網民認為好煩：
對狗點解要不斷講英文，細佬無養，真係唔識。今次網民的反應，相信源於就連無看《巨輪》的都知道，鍾嘉欣於該劇不斷狂loop "oh my god"、"really"，可能令觀眾猶有餘悸：
（wikia 圖片）

除了煩之外，暫時看了幾集《警犬巴打》，都算幾悶。配搭已經悶，鍾嘉欣與黃宗澤合作過2集《溏心風暴》、《珠光寶氣》、《護花危情》； 與黃浩然則有《大藥坊》、《囧探查過界》、《公主嫁到》、《老友狗狗》。而劇情，亦是監製黃偉聲繼前作《東坡家事》之後又一悶作，近年好像不拍住王祖藍（2套「老表」、《食為奴》）就唔識拍嘢（雖然上述幾套都唔算好好），打算再用郭晉安喜劇食糊的《阿旺新傳》和《東西宮略》都偏悶。之後「撈家」回巢作牌面有鄭俊弘、黃心穎已經夠趕客，監製旨意聲哥你，都相信好危下。