ViuTV《同2047特首上學去》觀眾、網民讚高質！

打完一場又一場硬仗，剛剛星期六日ViuTV 就推出另一個新人show《同2047特首上學去》，搵嚟鄒凱光、卓韻芝、馬浚偉、Robynn & Kendy，分別去天水圍香港學生輔助會小學、聖士提反書院附屬小學、荔景亞斯理衛理小學同黃大仙浸信會天虹小學，重返小學生活一星期。

4 間學校應該用心揀過：卓韻芝去名校，「灘叔」鄒海光去聚集跨境學童的小學，馬浚偉去「傳統」小學，Robynn & Kendy那間就標榜新科技教學。唔少網民都認為節目因此幾多元而高質。好似卓韻芝去寄宿名校，令唔少觀眾初次一睹小學寄宿生活，一個個面盤、攞住碟排隊攞飯，有觀眾網民就笑指幾有監倉feel。而聖士提反小學已經用北京話教中史、英文上到變英國文學、對中文老師要講北京話等等，都令唔少觀眾「開眼界」。
至於「灘叔」就最得觀眾歡心。造校服叫阿姐做「天水圍川保久玲」；第一日返學已經趕頭趕命最後遲到，去校務處又撩女職員，又無做功課。
最無厘頭係去跨境同學深圳屋企黐餐兼攨地方過夜（真人show，睇古就咪駁古），放學又奢侈請同學搭的士返屋企，一去人屋企就瞓落床；之後更會帶同學落「老蘭」，甚有教壞學生 feel 咁話。

馬浚偉雖然素來偏木獨、正經，但未返學一身體育服 look 已經被觀眾、網民笑佢個look 好戇X 但又無違和感。雖然學校最「正常」，但唔少觀眾大讚馬浚偉表現夠投入；反而Robynn & Kendy 就暫時偏悶咁話。

其實最重要係節目勾起唔少網民小學回憶，好似午餐飯盒十年如一日、小息衝向小賣部等等，或者見到現今的名校生不禁慨嘆自己細個無乜讀書。但亦有唔少觀眾認為節目以「日」分集，搞到每集不時穿插4位嘉賓的生活太的剪接方式太零碎。