[KJFOODLIFE 大角咀] 味歷亞洲海鮮自助餐 狂食長腳蟹即煮新加玻叻沙
見到呢個愈早訂愈抵既自助餐，諗住好耐無食過，見十五日前訂星期一至四三百蚊都唔駛，而家做緊亞洲主題又有海鮮一於去擦餐勁既。
今次就係黎到大角咀既呢間珀麗酒店，除左大角咀之外銅鑼灣都有分店，上到去就係好光猛既餐廳，因為六點半開始早左少少入去，真係由天光食到天黑。
大家一開始都係去攻佔呢個冰鎮海鮮區，一開始就搶閘去拎《北海道鱈場蟹腳》，大大條都夠新鮮同多肉，枱面放左較剪一剪開就食得。仲有提供《英國麵包蟹》，真係原隻蟹放係度任你拎，入面蟹膏豐富。貝殼類既就有《澳洲藍青口》同《沙白》，最易食又啖啖肉，方便之選，最後仲有《大蝦》。
食食下就送上左《原隻冰鎮日式璣煮鮑魚》，用上左用醬油同埋昆布慢火炆煮，原隻上真係一啲都唔孤寒，冰涼口感加上甜甜既醬汁都唔錯。
即煮區有《新加坡叻沙》，面條係即叫即刻煮，見到仲用上好靚既公雞碗，煮好後就倒上坐熱緊既湯，飲落叻沙湯底椰奶味濃郁再添上少少辣味，一陣間就成碗湯飲哂。
另外推介既就有《龍蝦冬蔭功》，酸辣食物真係令到胃口大開，用上指天椒、蝦膏、蝦頭、檸檬葉、青檸、南薑、香茅加入埋龍蝦，除左鮮味夠之外，飲落辣味都好足。另一個係中式既《砂鍋螺頭雲吞雞》，個雞湯好濃郁，煮6小時後再加入上海雲吞﹛見到成隻雞就知道夠哂足料。
好驚喜既係韓國區，有《XO醬炒韓式年糕》，大熱韓風緊係有炒年糕加五花肉，配上香港XO醬好惹味，記得要食埋隔離既《韓式煎餅》，真係真係超好食。唔少得仲有《韓式炸雞》，食左幾舊個皮都脆同雞肉仲好嫩滑。
係叻沙區側邊有呢個《即切牛扒》，一大塊真係好吸引，叫完就會即時幫你切，配上燒汁同埋芥末食，見到中間果陣嫩紅色，燒得岩岩好。
中式野當然唔少得喇，估唔到《叉燒》都整得唔差，個蜜汁勁入味，最估唔到居然係有《東玻肉》，一層肥一層肉真係超好食，肥呢啲野真係掉埋一邊。
湯品提供兩款，有《周打湯》同埋《節瓜咸蛋湯》，一打開個中湯已經聞到勁香，飲左碗都加埋啲湯底真係落足料。
點心有我最鍾意食既《蝦餃》，皮唔會好厚入面蝦肉都彈牙，另外有《皮蛋豆腐配四川麻辣汁》同埋《豆腐肥牛鍋》，一凍一熱。
泰式食物方面就有《生菜包》，新鮮既生菜配上辣辣既肉碎當然受歡迎，仲有《青木瓜沙律》夏天食一流，一大條魚整既《明爐蒸烏頭》，魚肉夠滑，配料夠入味。
日式野食方面唔少得有《壽司》，三文魚腐皮甜蝦基本款，《吉列大蝦》《吉列豬柳》同《咖哩薯餅》夠熱夠脆，記得要點上旁邊既酸辣醬。比較特別有呢個《照燒牛肉芝士卷》，薄薄既牛肉包住左芝士。
食到最後點會少得甜品，一杯杯既專區有《藍莓香草慕絲》，成個色彩都勁靚，仲有《士多啤梨沙巴翁》，呢個唔係度度有得食，蛋黃加沙糖再加少少酒，今次有埋少少士多啤梨香。
雪糕有得揀《瑞士Mövenpick雪糕》，今次有咖啡味，乳酪味同雲尼拿味，除左就咁食仲有其他用途陣間介紹，最特別係有幾隻款既《懷舊雪條》，一齊重溫兒時回憶。
蛋糕款都有唔少，《Tiramisu》餅條整得咖啡夠入味同軟淋，呢個係最好食，仲有《黑醋香橙朱古力慕絲》，朱古力迷真係至愛，成層朱古力鏡面，入面仲有橙絲配搭。
如果想食中式甜品都有《豆腐花》，試左一碗都幾滑溜，仲有《楊枝甘露》同《麵包布丁》，如果帶媽媽爸爸黎都岩食。
雪糕既另一用途黎喇，可以試玩呢個一禁制就即整《Pancake》，望住佢由粉糰慢慢壓焗出黎，加上雪糕又係一道甜品。
唔少得就有咖啡，茶呢啲飲品，最貼心係有個即禁即出熱毛巾既機，唔會浪費即禁即出夠衛生，真係岩哂食完海鮮既我地。
店名：協奏坊西餐廳
地址：大角咀大角咀道86號九龍珀麗酒店2樓
即刻入去Like & Share埋我地既其他頻道:
Facebook: KJFOODLIFE飲食玩樂地圖
Instagram: KJFOODLIFE
Website: KJFOODLIFE飲食玩樂地圖
Openrice: KJFOODLIFE
歡迎合作或查詢:
Email: [email protected]
餐牌:
