[KJFOODLIFE 旺角] 柞木炭網燒韓牛 原汁原味牛脂豐富

就黎到新年，要慶祝終於又過一年最好就係食番餐滿足又自己鍾意既野食就開心，揀緊就見到呢間用炭燒同韓牛既韓燒店，一諗起食最愛既牛肉已經勁興奮。




餐廳用上柞木加上網燒，木炭可以燒得耐更令牛肉有炭香味，而且個火力更猛，可以用短時間將精華留住係牛肉入面。當然唔少得就係韓燒必要既芝士栗米，燒溶芝士之後拉絲咁食真係無得頂。




前菜方面都好有特式，原壺上枱既泡菜比一般餐廳唔同，店員即席係面前剪開一顆顆既醃好既泡菜，同平時餐廳唔同更加多一份即製既體驗。




就黎新年想食好野又唔想諗最好就叫套餐，《尊貴新年套餐》($680)先黎個頭盤《九節板》，係過年必食既吉祥食物，用上脆脆既紫菜米餅，包住韓牛、蟹柳、紅蘿蔔、青瓜、冬菇等勁香口。




店員仲會幫手整高貴《海膽牛柳飯》，店員先將牛肉一整塊咁放上去燒，期間仲會講解韓牛既由來同埋燒既方法，燒好後剪開放係飯上面加上海膽，自然係有鮮味又有油香，撈飯食真係一碗話咁快就食完。






再黎就係燒海鮮拼盤，先黎燒勁大條既《濟州八爪魚》，店員一夾起真係超誇張，攤開真係可以霸哂成個爐，燒好剪開食有好香既炭燒味。帶子都係燒好再烤一烤邊就食得。









主菜緊係有韓牛拼盤，包括左有《1++韓牛牛梅花肉》、《1++韓牛牛胸腹肉》、《1++韓牛牛肩肉》、《1++韓牛牛肋骨邊肉》，燒既時侯已經勁香而且加上油脂真係好搶火，燒果陣已經好有睇頭。韓牛一放入口陣油脂爆哂出黎，而且好柔嫩，用上靚靚既韓牛真係款款都牛味濃郁。



食完咁多肉唔少得要有埋個《精選野菜》拼盤清一清，居然有鍾意食既秋葵，全部一次過放上去燒一陣就食得，每款都仲係好新鮮。

後記：想讚一讚店員除左會耐心幫我地燒同介紹食物之外，因為有啲突發意外佢地都好細心落力幫忙，呢個真係值得要讚揚當日既店員。


店名：柞木炭家
地址：旺角彌敦道700號T.O.P This is Our Place 5樓501號舖

即刻入去Like & Share埋我地既其他頻道:
Facebook: KJFOODLIFE飲食玩樂地圖
Instagram: KJFOODLIFE
Openrice: KJFOODLIFE

歡迎合作或查詢:
Email: [email protected]

餐牌: