[台南景點] 北門區一日遊 遊客中心之浪漫水晶教堂 井仔腳瓦盤鹽田看台南最美日落

台南比較為人熟悉既旅遊區係安平區，即係安平古堡個邊，之前都介紹過。今次介紹既係偏遠少少既北門區，重點係去鹽田睇日落，而日落之前就可以去附近既北門遊客中心行下。


北門遊客中心係一個好繽紛、好多藝術裝置的地方，由北門洗滌鹽工廠改建而成。室內係一個展覽廳，有唔少關於台南同北門的歷史資料，場中央有一個好大好大的鯨魚標本。室外有好多幅七彩壁畫，仲有希臘風的裝飾，係唔少台灣人影結婚相的地方。但個日實在太太太太熱又好曬，所以只係影左少少，其實現場仲有「Love」字樣的裝飾、彩色小屋個d。


而最吸引遊客的一個影相位係水上教堂，完全係關島水晶教堂的風格，在台灣難得一見啊。不過教堂唔開放俾人參觀，準新人想參觀好似要預約，所以對遊客黎講，教堂距離有點遠，只可以離遠望下影下相。


睇完教堂差唔多日落就搭車去井仔腳瓦盤鹽田，由遊客中心去鹽田距離只係15分鐘車程。第一次去鹽田，景觀都幾得意。鹽田分左一格格，每格都有一堆三角鹽，好多好多個小鹽堆。井仔腳瓦盤鹽田係北門第一座鹽田，都係現存最古老的瓦盤鹽田遺址，由1818年保留到而家。鹽業係以前台南重要產業，想知道多一點點關於鹽的生產方法同故事黎台南就岩啦。


鹽田有幾格係體驗區，俾遊客落去試下用工具曬鹽，好多小朋友落去玩，都係一個親子活動好地方。


唔同光線下由唔同角度影出黎的鹽田都有唔同感覺，雖然未日落都瘋狂影左好多相。鹽田有少少水，所以都會有天空之鏡的效果。

鹽田有個瞭望台，由3樓望落黎，鹽堆變得好迷你。


其實大部份遊客黎都係為左等日落，到真係日落個時，更加係影唔停，因為真係太太太靚啦！！勁大個鹹蛋黃，睇得好清楚！！
太陽落左之後入黑前個段時間都仍然好靚，個天深藍色再加兩行金黃色晚霞，非常非常浪漫的景色啊！所以記住睇到完全入黑先走呢～


北門遊客中心
地址：台南市北門區北門里200號交通：台南火車站搭公車藍幹線去佳里站，再轉搭公車藍2號，在北門站落車行5分鐘
開放時間：9:30 - 17:30 （每月第一個星期一休館）
網址:http://bvc.swcoast-nsa.gov.tw/center.html

井仔腳鹽田
地址：台南市北門區永華里西南郊井仔腳復育鹽田
交通：北門遊客中心搭公車藍2號在井仔腳站落車，車程約15分鐘
開放時間：24小時
網址：http://tour.tainan.gov.tw/view.aspx?sn=153

台南搭車比較麻煩，北門區又偏遠，建議大家上公車網站睇睇個路線同時間表。
興南客運網址：http://www.snbus.com.tw/