[荷蘭景點] 風車轉轉轉 近阿姆斯特丹的風車村 Zaanse Schans

風車是荷蘭的其中一個代表物，荷蘭有兩個風車村比較出名，一個是離阿姆斯特丹好近的Zaanse Schans，另一個是Kinderdijk小孩堤防，呢個好遠，所以我就去左近的Zaanse Schans。由阿姆斯特丹Central Station出發，乘搭前往Alkmaar的火車，在Koog-Zaandijk站落車，全程大約20分鐘就去到啦，快靚正。


一出火車站行大約10分鐘就會見到在河邊的一排風車，呢度有10座風車，每座都有唔同作用，風車透過風力發動可以用黎製造好多野，可以鋸木、榨油、染料等等。以前荷蘭的工業都靠風車來發展，全盛時期呢個地區有超過一千座風車！不過後來就唔再需要啦，而家呢個風車村基本上都只係為左令更多人認識風車的結構同歷史而存在。

其中幾座風車開放參觀，統一每間收4歐入場費，我真係從來冇諗過風車裡面係咩黎，於是揀左入去一架染料風車裡面參觀下。呢座染料風車有名的，叫De Kat，是世界上最後一座由風力驅動的染料風車。最初建於1646年，經歷過幾次火災之後重建，已經好耐好耐歷史，時至風車今日仍然在轉動，裡面都仍然郁緊的，但已經唔知道實際點樣運作，即係睇唔到到顏料製作的過程，只係估估下大約原理。


如果想參觀的話出發前要查下風車開放時間，風車村全年開放，但風車並唔係全年都開放參觀的。


除左風車，木鞋都是荷蘭獨特的名物，呢度仲有木鞋工廠，介紹木鞋的製作過程同歷史，有超級多款式的木鞋同供拍照用的巨型木鞋，可以買對返香港著......即刻走在潮流尖端。仲有其他小型博物館可以參觀下，例如鐘錶博物館、食品雜貨博物館（這什麼啦～），另外都有商店同小食店。


風車村環境本身幾靚，田園風光，又有屋仔同運河同湖，可惜我去個日陰天又大風，所以不宜久留，如果天氣好應該靚好多。


離開風車村之後我去左隔兩個站的Zaandam行街，本身係去程的時候見到呢座得意建築物，所以想落車睇下，原來係間叫Inntel的酒店，設計係將好多間小木屋放埋一齊構成一座建築物，好可愛！呢度仲有好多顏色好繽紛，外形又好奇特的建築物，同市中心的屋好唔一樣。如果對奇特建築有興趣，可以去荷蘭另一個城市叫鹿特丹。


因為酒店的關係就無意中就發現隔離條購物街好好行，有好多平價牌子，重點係有窮人恩物Primark！如果你唔知咩係Primark我一定要話你知，佢係同H&M風格相似但價錢再平大約一半的服裝店，幾年前在倫敦對佢一見鍾情，自此念念不忘。呢度一件衫幾歐起，一個袋都係10歐左右！！！衫之外仲有好多零零碎碎野，內衣呀化妝品呀床單呀毛巾呀拖鞋呀之類，都係平到癲左。其實市中心都有間，不過呢間少人d好行d，所以風車之旅最後以購物結束。大家都可以安排一個風車加購物遊。