[清邁景點] 不一樣的寺廟 白龍寺 純白無瑕的白廟

對寺廟的印象一直都覺得一係就古色古香，一係就金光閃閃，但清邁有一座寺廟與眾不同，全座都係白色，非常特別的白龍寺，又稱白廟。其實正確位置係位於清萊，離清萊市中心約半個鐘車程，如果清邁出發，要成兩個半鐘先到！不過去清邁的人比去清萊多，好多人係由清邁出發，參加一日團或者包車去白廟再加其他附近景點，所以就當住佢係清邁景點啦。


白廟入場費泰幣$50，張門票都幾靚。提提大家唔好著短裙短褲黎寺廟，唔俾入場架，工作人員會叫你去對面其中一間店舖租一塊白布圍住自己下身先可以入場。白廟是一個很受歡迎的景點，我去個日都幾多人。一入去已經係一個好靚的影相位，白廟前有個好細的湖，個湖反映白廟的倒影，好靚！


細看白廟其實唔只白色，仲有銀色的邊，銀鏡鑲邊為白廟帶來一點點閃亮，更加靚！白廟1996年先開始建造，比起其他傳統寺廟是非常新的一個。由泰國首席藝術家Chaloemchai Khositphiphat設計及監督建造的。入主殿前先要赤腳走過一條橋，入口就要除鞋。呢條橋有由地獄走到天堂的意思，所以不能回頭。橋的開端兩邊地下有好多向上伸手的雕塑，密密麻麻，被稱為尋求救贖的手，仲有骷髏頭，有少少恐怖......


行完橋就入到主殿，不過入去之前都可以先行一行主殿外圍，近距離欣賞白廟的雕刻，真係好精緻。


主殿可以參拜，最有趣係主殿的牆身竟然有大家熟悉的卡通人物圖案，有蜘蛛俠、蝙蝠俠、叮噹、比卡超......同一般寺廟的設計實在太太太唔同啦！！裡面唔可以影相，所以大家要親自去睇睇有幾創新啦。


行完主殿其實就已經差唔多到出口，見到後仲有幾座新的建築，不過應該未起好，所以都唔可以行過去住。


側面睇白廟都一樣靚！

白廟對面有座金光閃閃的......以為是另一個寺廟？錯啦，係廁所黎架！！！聽說係全泰國最靚的廁所，哈哈！另外仲有賣紀念品的店舖。白廟真係令人印象好深刻的寺廟，非常值得一訪！


白廟（Wat Rong Khun）
地址：Pa O Don Chai Road, A. Muang, Chiang Rai
開放時間：每日9:00-18:00
入場費：泰幣$50