【激死人系列】「點解個波次次都彈落佢到㗎？我都唔想架～」

話說早兩日鬥波，四打四；連打三場，輸足三場（極度無癮），無人跟隊，輸咗就再打，打完又打。
同我一隊有條友，我叫佢泡菜。

呀泡菜仔，係典型鍾意飄响出面射波嗰隻。用個“飄”字，一來因為佢瘦，二來因為佢射波個人會“鐘前”，出手好似唔係幾使力咁。

準唔準？因為佢個form，尤其係下身，太鬆，好唔穩定。有啲人，無論佢出手之前炒咗幾多球都好，佢起親手你都會有一種放心嘅感覺，唔入都好，你唔會怪佢起手。呀泡菜仔就一定唔係呢隻。神經刀上黎，佢都可以連入到兩、三球。問題係，佢唔識分自己有無手感，永遠無視場波嘅情況，係又隊，唔係又隊，毫無戰術意識，兼無耐性。

咁，都算啦。

或者你會話：「喂！咁都仲有得算！？經已好X離譜啦吓話？」
但佢最令我燥底嘅，的確唔係呢樣。

我佢同一隊呢三場入面（其實以前打開，佢一向都係咁），佢都Mark同一個人，無嘢嘅，只係被嗰個人拎咗100個進攻籃板、執雞執咗200分咁啦；而嗰個人雖然大隻過佢，但矮佢成半個頭咁濟。

我第一場經已出聲：“孭位呀大佬，你咁樣，無得打架喎！"

可能係被我話完，佢有啲唔好意思，開始响每一球輸完籃板之後交戲俾我睇，不停抱頭、chok個無辜樣出嚟：

“呀～點解個波次次都彈佢個邊架～～”
“唉～又係咁！”
“妖～係咪咁好彩呀佢～”
“哎呀～”

於是我忍唔住，再講：“你企响佢同個籃之間咪得囉！” （其實我心裡面好想嗌嘅係：孭位啦XX！）

當然，情況唔會有變，我只好出多兩錢力，盡量孭埋佢個份，但，十個煲九個蓋，又邊有用呀？

嗰日打完場波，一肚都係火，成晚都覺得勁無癮。
鬥波遇着呢挺得把口、唔出力嘅隊友，你話係咪人都癲？

有無人有無類似經驗？分享下！或者直接黎我個page說籃到留言tag自己啲friend呀！

－－－－－－－－－－－－－

過往精彩文章：

1)【激死人系列】射唔入，其實真係唔緊要，可唔可以守波？


－－－－－－－－－－－－－

（抽水時間）

我哋又嚟睇下Harden近日嘅精彩表現～