你點解成日笑？

他叫阿憂，人不如其名，他總是很快樂，時時忍不住大笑。他的快樂卻令身邊愛他的人擔心。

小時候，人人都瘋狂皺眉，鬱鬱寡歡之際，
他卻瘋狂地覺得愉快，小小事情已能令他眉開眼笑，比如吃到一顆美味多汁的提子。
當教育家、電視機、隔離左右全世界都在宣揚人人要擁有一個「憂傷童年」，
偏偏他，阿憂總是笑呵呵。
他的家人很不安，於是帶他去看醫生。

經過問卷、磁力共震、會診後，醫生嚴肅地宣布他缺少了一種賀爾蒙叫安少芬（ensiuphin），令他先天憂傷不足。
他的媽媽立時眼泛淚光：「咁點算？會唔會影響佢成長？」
醫生遲疑地說：「嗯……都有可能。咁啦，我開啲藥俾佢，令佢唔好咁易開心。你地又教下佢，做人要悲觀啲。講多啲喊嘅好處佢聽，等佢潛移默化左，希望可以幫到佢啦。」
於是他開始了吃藥的生涯。
阿憂討厭吃藥，吃藥後他總覺得倦，有時會抑鬱，雖然變得跟其他人差不多，但他總感覺得那不是他。

他懷念那個會笑的自己。

有一天他問媽媽。
「媽咪，我係咪唔可以笑呀？」
「傻仔黎嘅，梗係得啦。不過唔好太超過囉。笑得太多會影響身體。」
「但係，我真係好開心，想成日笑喎……」
阿憂媽媽的臉刷一聲變得白了，眼裡流露恐懼。

阿憂看見了。

他趕快擠出一滴眼淚：「我講下笑咋媽咪。其實我成日都好唔開心，好想喊嫁。」
「衰仔，搵呢啲嘢玩，嚇死呀媽喇。」阿憂媽媽苦著一張臉放心了。

自那天開始，阿憂偷偷把藥藏起來，並觀察身邊的人。他學他們垂著眼，哀傷痛苦地生活。
在那些演技還未爐火純青時，也發生過一些壓在阿憂心頭的事。
有次老師問關於半杯水的問題。
他口快快地答了：「好彩仲有半杯水飲。」
全班只有張小明和他一起選擇這個答案，但那張小明後來弱弱地小聲說只是舉錯了手。
結果全班都選擇「得返半杯水，點算好呀？」
老師滿意地點頭，稱大家有這樣的危機意識很成熟，教訓我心態如此輕鬆，將來可會吃苦的啊！

後來，阿憂結交了一個好朋友。

他小心翼翼地問：「你……會唔會成日都好開心？」
朋友疑惑地說：「唔會呀。我成日都好唔開心。總係諗人生存喺呢個世界有咩意義。」
「但係……食到好味嘅嘢，睇到好笑嘅片，識到好正嘅朋友，你唔覺得開心嫁咩？」
「都會嘅，但嗰啲開心好短暫好膚淺。我會想知人死左之後究竟係點，究竟人有無靈魂呢？我地而家呢刻係真實定幻象？人可以決定命運定命運早已被安排？」
「哇！咁複雜嘅？」（阿憂心想這些對他來說全都不重要，可以擁抱心愛的人，可以感受陽光的溫暖，可以吃可以睡可以拉，已經很足夠。）「點會呀。個個都係咁嫁啦。成日開心嗰啲人應該有病，要去睇下醫生。」

阿憂覺得有點窒息，悄悄告辭。

有時阿憂會無聲問神為何要令他和別人不一樣。
「希望第二朝起身可以好似其他人咁，自然覺得唔開心。變返個正常人。」
但每當他睜開眼，那份快樂依然留在他的心底，他只好又戴上憂愁的面具外出。

有時阿憂又會覺得自己沒有問題，雖然成日笑，成日覺得開心，但他沒有傷害人呀，自己也過得好好的，究竟有甚麼問題？社會為何這樣逼迫他呢？

＿＿＿＿＿＿＿＿＿＿＿＿＿＿＿＿＿＿＿＿＿
天使：「上帝，祢是咪玩阿憂？佢好似好痛苦咁。你係咪做佢嗰陣真係落少左咩安少芬？」
上帝：「我會錯嫁咩。我做佢地每一個嗰時都好獨特。無一個人有問題，係佢地自把自為定落啲咩『健康人生』、『成功人士』咋嘛。『神看著是好的』你有無讀過？」


photo credits to Cutbu(超鍾意佢啲post!!!)