善良平實的人也有機會成為第三者
小時候曾誤以為出軌或是做第三者的人必然是花花公子或是壞女人，雖然坊間有這樣的一句話：「靚仔會偷食，醜樣嘅又會偷食，噉我點解唔揀個靚仔？」但其實大部分人依舊覺得靚仔較大機會偷食（其實靚仔只是較多機會偷食），而事實是對愛情的忠貞從來與外貌、有時甚至與好人與否無關，所以我們才常常會有「吓？！估佢唔到喎。」這樣的反應。長大以後我明白到，大多數身陷當中的人，直至深陷之前，都沒有想過自己會成為當中的主人翁。
眼前的女生我已認識好幾年，還記得第一次見她是在2019年的簽書會中，當時她說著說著話就哭了，所以我印象很深刻，後來網上開始間斷地聊天，了解到她雖然看似爽朗獨立，但其實內裡很多心事。今天是我們第一次真的面對面坐下聊天。在開始講她的故事前，她似乎需要很多心理準備，初開始說時有點零碎，或許也與事件涉及敏感情況有關，總之起初事情的脈絡讓人有點摸不著頭腦。
「我同個男仔喺2019年再撞返大家，我哋以前唔係太熟，因為當時情況特殊，大家理念同行動都好一致，所以成日約埋一齊出去，漸漸變成出雙入對，相處時間多咗，又出生入死，於是對大家嘅信任度就高咗，會開始講心事，有時都會一齊食下飯噉。」
聽上去很不錯呀，能找到與自己同步的人相當不容易呢。
「我有個朋友話我對佢嘅感覺係吊橋效應，我好嬲！」？？？
為什麼忽然冒出個朋友和吊橋效應？但我姑且先記錄下來：非吊橋效應，即是她認為自己對男生的感情並非一時錯覺，是認真而真實的。
「佢係一個好溫柔嘅男仔，我呢好鍾意飲珍珠奶茶，鍾意到啲同事都知，有次佢知我狀態唔係太好，就買咗珍珠奶茶嚟接我放工，然後同我一齊散心。我哋成日一齊周圍行，會行好耐，有次行海傍，行行下仲畀我哋見到螢火蟲。有一次我發生咗啲意外，整親隻腳行動不便，第二日佢就嚟搵我。我身邊都有對我好嘅男仔，但佢對我嚟講係特別重要。而我哋都好有默契。」
就這樣聽我覺得男生很浪漫，很不錯呢，而且有高強行動力，還和她有默契，真的讚喇！後來我才發覺，原來此「默契」不同彼「默契」。她說的默契是各自保有有分寸的意思。
「佢係有女朋友嘅……」
What?!!!!
「有一次我哋共同出席一個場合，佢帶埋女朋友嚟，噉我都冇特登打招呼，只係同自己朋友一齊，點知佢送完女朋友走之後，返嚟搵我。我諗我啲朋友都覺得odd。」
剛才對故事的期待已經一掃而空，看著眼前帶點悲傷的她，想來結局亦不甚美好。
「8月嗰時情況比較激烈，你都知當時交通好混亂，咁啱我屋企人去晒旅行，所以有幾日完咗我就叫個男仔直接嚟我度瞓……唔知點解，我哋傾傾下偈就一齊喺梳發瞓，佢攬住我瞓成晚……」
我習慣把事情問得明白，這樣才能掌握真實情況，故事的感覺才不會偏差：「噉……你哋有冇發生關係？」
「冇！係有一日瞓醒起身，大家塊面貼得好近，我哋凝望對方，爭啲錫咗，但我記得佢係有女朋友，有啲界線係唔可以越過，所以最後咩都冇發生。」
我欣賞她在意亂情迷下仍然沒有完全喪失自己，不過其實一起擁抱入睡也很over喔！母湯喇！！！
隨著行動降溫，加之疫情的緣故，她與這個男生便漸漸淡了下來。（難怪她的朋友說這是吊橋效應）
「其實我真係好珍惜佢，我好少可以噉樣打開自己同人傾偈，所以有時會好嬲，其實我唔係要同佢做啲咩，真係有必要噉疏遠我咩？我覺得自己好似冇咗個朋友。」
「你哋噉樣真係朋友？我問你，如果佢冇女朋友，你會唔會同佢一齊？」
她點頭。
「係囉，我再問你，如果嗰日佢格硬錫落你度，你估你會唔會避開或者推開？」她猶疑。
「所以呢，我覺得佢算係仆街中嘅冇咁仆街。」
「你都覺得佢衰？」
「當然啦，仲需要講？有女朋友仲走去撩第二個女仔，做埋啲咁走心嘅嘢，搞到你沉船。正仆街嚟！佢唯一嘅好，就係遠離你冇拖住你。」
「但我覺得佢如果真係想同我畫清界線，應該好好同我講聲。嗰時搞到我唔知搵唔揾佢好，出去嘅時候又唔知等唔等佢，大佬，佢唔出我就要搵第二個人一齊，一個人好危險㗎。」
我忍不住嘆了一口氣。
「傻囡嚟，有咩清楚得過佢用行動表態？」
她面露倔強，我知道她仍不明白。我知道這是每個不心息的人都會犯的錯，我也曾如此。
「如果要完結，我想佢同我講清楚。」
我不得不說：「而家仲唔夠清楚咩？我問你，佢疏遠你之後有冇再主動關心過你？」
她搖頭。「係囉，佢已經揀咗㗎喇，就係放棄你，佢揀咗女朋友嗰邊。唔同你聯絡就係斷嘅意思，唔需要再有咩說明㗎喇。」
有些人就是這樣懦弱，不想自己做衰人，不想面對自己遺下的惡果，所以連說再見的勇氣也沒有，語意一直曖昧不清，但你不要以為他們對你有所留戀，你看他們的行動多決絕，已清楚說明了心意。我們就面對現實吧。
她的眼睛紅了。
我也覺得自己殘忍，但我此刻不對她殘忍，她的瘀血一直積存才是不好的。
「多謝你，有啲嘢可能我自己都知，但由人哋把口講出嚟又係另一回事。雖然返到屋企可能都會難受一排。」
對呀，傷口不會因為理解受傷原因或是得到適當治療就不痛，治療是一個過程，必需要經過時間。
「你呢，將心事收得太埋喇，可以嘅話搵值得信任嘅朋友分享多啲，噉先唔會變成內傷，有時又可以多個角度睇件事，唔好咩都自己一個受晒，唔需要㗎。」
下一次，希望你能遇到一個更好的人，託付你的心。
祝福你喔！