到底一個人搬出嚟住要洗幾多錢？
廢事大家TLDR，講咗結論先，我認為正常社交慳住洗仲每個月想儲到少少錢（幾百到千零），保守估計有萬五鬆啲係足夠嘅。（當然隨住物價調整（多數都係上漲），大家以後睇返呢篇文再加加減減啦）
有時聽到身邊啲朋友話想搬出嚟但好難甚至做唔到我都會𢲷晒頭，我都做到，你點會唔得？呢個唔係冷血嗰啲「我得你都得」嘅正能量，而係錢係一樣好客觀嘅數據。斷估你哋都唔會搵得少過我，明明有啲都賺成兩萬幾三萬，都咁頭痕？你畀我個個月賺到呢個數，我覺得自己離天堂已不遠。後來我先明，佢哋話嘅「想搬」其實唔係真係好想，佢哋講嘅難同做唔到唔係實際情況，而係佢哋覺得搬出嚟但又要維持而家嘅生活水平好難，甚至做唔到。
真係一天都光晒，大佬，你多咗咁大舊嘅恆常支出，物質生活一定係會減少甚至質素下降，好正常。邊個同我講少咗錢，反而生活條件好啲，我真係好想佢過兩招畀我。唔怪得身邊永世有人長期呻想搬但遲遲冇行動，我而家對住呢啲人真係膠都廢事派。所以呢篇係寫畀一啲就算付好高代價但仍然真心想搬嘅人睇，即係屋企對你嚟講好似地獄噉，早一日脫出就係早一日得救。
好多人都知，我係搬屋、辭職、開始全職寫作一齊同時進行，諗返起都覺得好癲，但同時又理所當然，所有嘢當時都應該係噉行，錯過咗我唔知仲有冇第二次機會，但其實你問我，呢一切並唔係喺我計劃之內。慶幸我一向係個冇乜安全感嘅人，所以唔係月光族，我都唔介意話畀大家聽，當時我係儲咗十萬（如果我知道2018年尾自己會噉，之前一定會再儲多啲錢）開展我呢個第二人生，我有諗過當戶口得返大概四萬或更少，我就搵返全職，慶幸最終都唔使動用呢個緊急應變方案。
第一年接到嘅Job唔多，當時又未開Patreon，收入都幾唔穩定，有好多個月收入都係得萬頭，試過有個月連一萬都冇，可想而知赤字就係我每個月嘅朋友，有時搵到Part Time幫補下就會好啲。當時嘅生活就係慳得就慳，除咗生活必需品，我幾乎唔買任何嘢，出街朋友都會就我唔食貴嘢，旅行呢啲奢侈嘢就更加唔好講。我嘅工作比較簡單，基本上只要一部電腦同我個腦就可以，電腦大學時買咗所以都no cost。
在家工作幫我慳咗唔少交通費，飲食個人習慣一向唔食早餐，又慳咗啲，但窮嗰時我試過一餐可能食一個杯麵就搞掂，唔係講緊一日半日，講緊好多餐，有時食厭杯麵就食超市買嗰啲叮叮飯/意粉，應該一盒廿蚊都唔使，食到後來我Roommate問我驚唔驚生癌。所以對Roommate嚟講杯麵係佢嘅comfort food，但對我嚟講食餐好嘅貴嘅先安慰到我。不過都唔係時時咁慘，冇Job即係有時間，嗰時一星期都至少煮兩、三餐飯，同Roommate share 返又唔會好貴，都叫做補充返啲營養。
之後第二年年中就開始漸入佳境直至現在，有時可以買下衫，同朋友去下玩，食下稍貴嘅嘢，唔使再返唔關寫嘢嘅兼職，最近仲抽到時間去見唔同人免費寫低我覺得值得嘅故事，因為呢篇唔係share工作我就長話短說。不過所謂佳景其實平均都係未賺超過兩萬（笑），但對比頭一年半，而家手頭已經鬆動好多，即係有時一日要寫兩篇文冇時間煮嘢我嗌urbereats係唔會覺得有罪惡感。講咗咁耐其實都係想同好忐忑不安猶疑搬唔搬嘅朋友講，其實唔使驚㗎，雖然好多人都話搬出嚟要洗好多錢，咩燈油火蠟樣樣都要計，其實嗰度唔係使你好多，頂盡一千幾百一定搞掂，仲要水電媒呢啲都唔使個個月畀。
好彩嘅搵到啱嘅Roommate一齊住，間屋咪大啲靚啲舒服啲，洗費有人同你share，但都要互相遷就，搵唔到啱嘅自己一個住都唔使世界末日，因為你擁有世界上最寶貴嘅嘢，就係自由。其實搬出嚟住除咗少咗錢洗，基本上真係好開心，你唔使返去令你仿如置身地獄嘅屋企，心理壓力已經輕返唔少，個人冇咁唔開心，你就可以見到多啲可能性，對生命有返啲留戀，就會搵到更多令你快樂嘅事，呢啲係有錢都補唔返嘅嘢。
我諗我三份一嘅收入都去咗交租，賺得少嗰時可能幾乎一半都去咗租金，對好多人嚟講可能好恐怖，但我覺得呢個地方拯救咗我，我成日講笑噉講，如果我keep住冇搬出嚟，可能有日大家就會喺A1見到我。救命錢嚟，唔慳得。
搬出嚟住可能一開始會辛苦啲，因為一嚟就要畀兩按一上（即係兩個月租做按金，加第一個月租），一次過畀三個月租都咪話唔甘（如果唔係業主盤，仲要畀半個月租佣經紀），另外有啲傢私又要添置，但係會愈嚟愈好嘅，因為你會掌握到自己生活嘅節奏，知道邊度可以再慳啲，邊度應洗則洗，就好似我從來唔會cut晒啲社交，因為冇社交係可以慳好多錢，但做人仲有咩樂趣？我唔係追求生存，我係追求生活呀，最多減少，但一定唔可以冇。同時你又會加人工（如果你份工年年都冇得加，不如考慮轉工？），所以一切只會向好嘅方面發展。但我當萬一有咩意外，最多咪搬返屋企住，而家啲約都係一年生一年死，仲有啲短租幾個月，咪試下先。唔試點知可唔可行？得個諗字就真係永遠困死自己。
我覺得自己人生做過兩件最正確嘅事就係，一嘗試全職寫作生活，二搬出嚟，至今仍然唔後悔。呢幾年嚟每隔一段時間就會有讀者inbox我話佢哋都搬咗出去，我真係冇聽過一個人講覺得自己落錯決定，每個人都係好開心好開心好開心，有啲人仲轉埋運。因為當你重生，個世界真係可以好唔一樣。
以上言論只係適用於置身於家地獄嘅人，即係如果你只係覺得父母煩咗啲冇乜私人空間，噉你真係攝高沈頭計好數先郁，唔好話我水你，我連食杯麵都同你講埋，唔係講笑㗎。但如果你好想好想好想搬出去又有收入唔係學生哥，Go ahead，放心啦，件事唔係想像中咁難。