原生家庭的夢魘並沒有那麼輕易能被抺去

她說要移民時，我還以為她是與老公一同到彼岸開展新生活。結果剛坐下不久，她就對我說：「我離咗婚了。」我內心有點小震撼，當然我知道今時今日離婚雖未至於是件稀鬆平常的事，卻也並非世界末日，但與我年紀相仿同時是認識的朋友經歷此事，始終在我心中翻起了小小的波浪。
她微笑著說：「你仲記得我同你分享過我一日唔結婚一日都離開唔到屋企？」我點點頭，她的故事我可從沒有忘記，即使已是兩年多前的事。（詳情請看〈因愛之名，她的一生已被摧毀。〉）

「所以某程度上嚟講其實我結婚可能都只係為咗離開屋企……婚姻生活同我想像嘅真係好唔一樣。我記得當時有同你講過，我先生會畀好多自由我，係咪？」我再點頭。

「嗰個其實係好聽啲嘅講法，而家我會話其實佢係唔Q理我。」嗯，有時關係上的過度自由，翻出來就是「不在乎」的意思。

她舉了一個例子，2019年有些時候外面情況比較緊張、激烈之際，她曾試過4–5天沒有回家，但先生竟懵然不知，又或是即使知道，也毫不在意。「雖然佢係返shift，但我都覺得未免太過份。而我印象好深刻嘅一次係，某日比較危險，完咗之後我打畀佢報平安，佢覆我：『咁大個人你自己搞掂啦。』從此以後，我就冇再因為噉打過畀佢。」實在難以想像怎麼會有一個這樣的枕邊人存在。
「嗰刻我開始諗，呢個人值唔值得我同佢捆綁一世？我資料上面嘅緊急聯絡人，我會希望寫佢個名？當我有答案嘅時候，我就決定離婚。」

當然要走到離婚這一步，背後自然不只是單單幾次心灰之事。

「我同先生結婚四年，大家都係返朝九晚六嘅工，但我哋從來冇一齊食過晚飯。每次都係我煮完，再拎畀佢食。原來佢屋企以前就冇一齊食晚飯嘅習慣，因為佢好鍾意打機。」

我整個黑人問號，我從沒有想過原來同枱食飯是一個奢侈的願望。

「噉……你哋拍拖嘅時候都冇一齊食過飯？」

「好似真係冇……我哋以前係同事嚟，日日都會見，加埋你都知我屋企有門禁，所以真係冇夜晚一齊食過。當時我仲覺得搵到一個咁遷就自己嘅人好開心，點知原來係因為佢屋企都唔太正常。」原生家庭禍害了兩個人，幸好他們沒有小孩。

「噉你有冇試過同佢傾呢個問題？」

「有呀，你諗下次次放工都咁畀心機煮，當然想一齊食。我咩方法都試過，嗲佢又試過，氹佢又試過，嬲又試過，傾又試過，都冇用。佢真係一個好鍾意打機嘅人，你同佢傾嘅時候佢都係一直打機唔望你㗎，到你再認真啲要求佢，佢就會覺得你係批評緊佢，佢會開門走，然後第二日先返。」我很驚恐，這是怎麼一回事？！青春期的少年嗎？！
「你先生……好細個？」

「唔係呀，佢大我六、七年㗎，今年都39歲了。」 WTH？！世界上為甚麼會有如此可怕的男人？！

「之後佢返夜班我哋就磨擦少咗，其實唔係因為相處好咗，係因為我哋唔使相處，哈哈。」我一直很喜歡她的黑色幽默，這是堅強人特有的從容。她的笑容不會使我難受，因為我知道她沒有勉強自己。當然，希望也不會有人白目到以為這真的是件開心的事。

「後來我哋分居一年，就正式簽紙離婚，嗰次係我哋最後一次見面。佢好搞笑㗎，我哋喺家事法庭簽好文件同宣誓之後，擁抱咗一下，佢仲同我講：『我仲好愛你，想同你一齊，你唔好走啦。』但之後搞掂晒啲嘢佢知冇嘢再要佢簽嘅時候，就頭也不回走咗。」救命，拜託這樣的男人不要再出來害人，好嗎？

正當我打算恭喜她脫苦海時，她卻和我分享遇上的第二個男人，我愈聽愈不安，真的有種「面都青埋」的驚惶感。

「佢可能都算乘虛而入嘅，嗰時我同先生搞緊離婚，個人始終有啲六神無主，係佢陪我搵新屋搬，又日日接我放工，幫我打點好一切。」乍聽上去還不錯，可是這個男人後來卻順勢搬到她的新家居住。
「我哋相識於2019年，大家有種戰友嘅感覺，同埋大家都有PTSD，我哋當時每晚都要靠酒精先瞓得著，同好易會扎醒。佢屋企人係好藍嗰種，會拎菜刀揮舞，我初時有一種當家長收留小朋友嘅諗法。講真，我真係從來冇諗過同佢拍拖，因為我唔知自己搵個男人返嚟做咩，基本上所有嘢我都可以自己handle，冇咩需要佢嘅地方。點知原來佢冇諗過搬走，仲話我再叫佢搬，佢就跳樓。」呀！！！！我在心入面大叫，現在是發生甚麼事？！

「起初我覺得佢都幾有內涵，會講好多我諗唔到嘅嘢，後來先知所有嘢都係佢喺電影或者啲talk show學返嚟，你都知我以前冇得睇呢啲㗎啦。原來佢得中三學歷，同埋喺碼頭返工，日薪出糧。我之後都唔想再刺激佢，就由得佢了。」

「下……噉佢有冇交租㗎……」

「講起呢樣就好笑，佢係嗰啲冇乜計劃嘅人，即係今日賺多咗$500，佢就會好開心，然後洗咗佢。佢後來決定交晒賺嘅錢畀我，會放落一個櫃桶，要用嘅時候佢再喺入面拎。有一次櫃桶啲錢用晒，佢仲嗲我問係咪我收埋咗啲錢，但實情係佢賺嘅錢太少，有時佢自己洗下洗下都冇咗。」

不好意思，這次我真的笑不出來。
「不過其實除咗錢之外，佢其他嘢都OK嘅，佢會好關心我，會煮嘢畀我食，我隨口講想去飛鵝山，佢又會借公司車車我去，會陪我周圍玩。」

「唔OK呀嘛（我掩臉），而家又唔係十八廿二，你頭先話佢同你同年，即係都32歲喇喎，32歲仲噉樣，得罪講句，可能佢同啲十零歲嘅MK妹一齊就適合嘅，大家一齊今朝有酒今朝醉。」

她拍手：「你講得好啱，我都係噉諗！之前因為疫情佢開少咗工，甚至後來冇返工，噉我當然都問佢幾時返啦，點知佢發脾氣話『你都係因為錢啫，噉我去紮鐵囉！結果佢返咗三日就冇返了，仲搞到要睇鐵打，blame返我轉頭『呢份工點返呀，搵錢都唔係噉搵啦』。」

好恐怖好恐怖，我幾乎覺得自己要吃藥定驚了。

「噉你而家仲同緊佢住？！」

「係呀，我都就嚟移民，唔搞咁多嘢喇。佢仲FF話以後會過去搵我，其實佢點會過到去。」

我真的覺得，她移民的選擇做得太對了。我真的希望她割斷這邊的一切，在彼岸重新開始，過第二人生。然後我再一次覺得，不論男女，大家找另一半時真的要金睛火眼，1+1不能等於2或是大於2的話，倒不如一直維持在1還比較自由和舒適。
關於移民，她說現在的香港已不再是她認識的香港，而且她在這裡本來就沒有種下根，她沒有好友，也沒有想要待在一起的家人，離開沒有太多掙扎，但她也補充：「不過都唔係話開心，始終人生冇諗過要離開呢個地方。」她說：「對未來都冇太大憧憬，渾噩過到就好。」

要是其他人，可能我會說也不用這麼灰吧。但因為是她，我只想衷心祝願她的新生活能夠過得平順。

分別前我對她說：「去到外國要戴眼識人呀。」
她說：「我真係覺得自己一個過得幾好，都未必識人喇。」

願你一切安好。