愛情信箱33：男朋友話淡左，但明明我對佢好好

問題：

我前2日同男朋友分左手，其實佢29號個晚已經講左，但我個時求佢又喊晒咁。分手既原因係我搞到佢無晒尊嚴，的確，我係成日發佢脾氣，又無理取鬧，但其他野我真係對佢好好，佢之前明明話呢啲係我既性格佢會接受。

我應承佢話會改，變到一個佢想要既人，但係佢已經對我好冷淡，淡到我覺得好辛苦。佢好似已經唔再愛我，我知道我幾努力佢都唔會再鍾意我。忍左10日，佢終於再講，佢話我唔會做到佢想要既人，所以唔好大家都再咁啦，無意思。我好痛，但佢就好似一啲野都無咁。
我好唔想分手，大大話話一齊左8個月，話多唔多話小唔小，點解可以一時之間變成咁...我好想同佢一齊翻，到底我好唔好繼續等佢？佢同我講有緣一定會係翻埋一齊，世事既野話唔埋wo，到底我可以點做😫
____________________________________________________________________________________

回覆：

其實淡左係藉口，唔中意就先係真。我明你感受，覺得佢冇啦啦咁樣好恐怖、好無助，不過有時啲人就係咁，明明前幾日仲係好sweet攬曬頸咁，依家就好絕咁講分手。我覺得你唔好等了，一個人講到咁姐係唔比機會你去挽留，與其繼續停喺度，倒不如去搵另一個真正珍惜你既人。

BTW無理取鬧都幾大罪，男人好忌，因為佢地會覺得煩，唔知點處理。所以開始下一段之前要努力改改自己壞習慣先，否則下一段可能都會終日鬧交。