愛情信箱39：因為打機飛左女友，依家想追返佢

問題：

你好呀,我感情上有D問題想請教下~

我同我女朋友拍左拖已經2年,係半個月前分左手,今次已經係第3次分手,每次都係我提出分手..分手期間我有同第個女仔一齊過,最後都係搵番佢,我承認我2年黎都冇好好珍惜佢,成日掛住打機唔理佢,今次仲因為打機中毒太深而同左佢分手。

上星期開始我搵番佢,想復合,但係佢話已經中意左第個,同時亦中意我。但係過左1日之後,佢主動約我出黎見面,一見到我仲攬住我,錫我,但係冇復合既意思,因為佢好怕我唔知幾時又同佢分手,對我冇信心。但係佢肯比1年時間我去改,去做成績比佢睇.同時佢都要搵番自己,諗清楚自己想點。
呢個星期入面,我地有出街,一齊食飯~期間都仲有情侶既行為,琴日佢仲叫我上佢屋企食LUNCH,但係佢成日同我講唔好咁大希望,佢怕最後唔同番我一齊會怕我失望,怕我付出既所有野都冇晒。而且佢仲係放唔低第個男仔,搞到佢個心好亂,唔知自己諗緊咩,同時我又無意間比左好多壓力佢,好似逼佢一定快D要同番我一齊咁。

去到今日,我做左一個好錯既決定,我拎番本相簿比佢睇,佢話唔想見到本相簿,佢愈睇只會愈傷心,之後佢同我講唔再中意我,亦唔好追佢,做番朋友。我完全唔覺得佢唔再中意我,係直至佢見到本相簿先好似變左第個人咁,我應該點做?我真係唔想冇左佢...
____________________________________________________________________________________

回覆：

你都衰喇！三次飛左女朋友，最後仲因為打機飛左佢？！我想問打機係咪真係重要過愛既人？冇人話打機同愛情唔可以共存，打機係冇問題，但都要留返啲時間比女朋友。所以你女朋友會心灰意冷都好正常，而佢中意左另一個男仔你亦冇權阻止佢，因為當初既你都係咁呀。唉其實我唔係好想你同返佢一齊，唔想呢個女仔再受傷、再受罪。

不過我都比啲建議你啦，首先要繼續搵佢，因為你比佢諗，佢就會愈諗愈想同你分手。同埋你諗下之前拍拖嗰陣做過啲咩佢係好開心既，你可以試下做多次氹返佢。再唔得既話真係最後一招，你試下喺佢面前DEL左個game，我諗佢會知道你為左佢去改過既決心既。