愛情信箱55：一場交就令心儀男仔疏遠我

問題：

其實成件事係咁：
我中意左一個男仔兩年，咁我一直都唔知個男仔點諗...有一次同佢嘈完，我同佢約左岀黎傾。佢就話佢自己其實之前都對我有好感，但同我嘈完交之後，想像到一齊左之後會點，話同我唔夾，所以就咁啦。但之後都有keep住曖昧，不過過左一段時間就停左，但我地都仲係朋友，成班都會約岀黎玩。

之後就到近排，我wtsaap佢話我好羨慕一個女仔，因為你地個個對佢好好。然後佢就問我又呷咩醋，個陣我答佢係真係羨慕...之後佢冇再覆我
隔幾日，我地一齊四個岀黎玩，佢就唔多理我，又唔太開心，同平時唔同咁。我問佢做咩，佢就話唔知點解要俾我影響到，搞到佢咁，又話唔應該被我影響到。但之後氹反佢加講清楚就冇事...點知本身佢約左個個女仔星期日岀街，我就一直都好唔開心。佢可能知道，星期日就問我咩事，我死都話冇咁。但今日個女仔先同我講話佢地冇岀...

尋日我地岀黎興祝聖誕五個人，咁其間未齊人得我同佢，我地有傾過下...佢就問我真係冇事？我就話係，只不過真係羨慕個女仔...佢問我原因，我話因爲你地對佢好好，好照顧佢。佢聽完就話我以前都好照顧你，係嬲你所以先咁。但其實佢都有大半年冇對我咁好。之後佢問我想點，想佢點對我。我個下話唔知，佢就話估到我想點，但係要我講。不過最後我都冇講到...但事後，佢有喂我食m&m，又打打鬧鬧，不過個個女仔到左，佢又冇點，而且見到佢兩個行後面傾得好開心。我唔知點做好，佢都有俾聖誕卡我。
我仲好中意佢，好想同到佢一齊。你睇完覺得我可以點，仲有冇機會😭😭
____________________________________________________________________________________

回覆：

我覺得呢個男仔點都對嗰個女仔有啲野，可能個女仔溫柔過你，所以佢會想同嗰個女仔玩多啲。成日啲女話咩「愛我就要接受我鬧佢，要接受我真實性格架啦....」之類既說話。但係我想講，如果啲女本身好惡，好唔講道理，咁邊有男仔會頂得順？我唔係話你，只係想講如果想佢回心轉意，可能你要表現到同以前唔同既一面比佢睇，等佢知道你有變到，唔係難依相處既一個女仔。

我唔知你同佢之前鬧交係鬧左啲咩，我知道佢仲係在意你既，不過嗰場交真係好大陰影咁。我好耐之前都試過同人曖昧，有次佢好惡好惡咁話我，我就發誓自己唔可以再中意佢！！因為我預計到如果我地繼續正常相處，之後佢仍然有機會對我發脾氣，我覺得自己接受唔到咁大脾氣既人，所以就完結了。我明白個你中意既男仔係咩感受.....嗰次後真係會驚左你。

你依家可以做既野係氹返佢，唔可以再好似whatsapp咁hea佢或者比說話佢聽，因為佢已經怕你，你仲咁樣等於進一步推開佢，叫佢唔好行近你度。你試下了解下嗰個女仔點解咁受男仔歡迎，可能佢身上面有啲特質你冇，學習下可能會對你同個男仔既關係有幫助。