如果兩個人只想嬴，咁呢段感情一定會完結

如果女朋友鬧你成日同女仔傾偈，覆人地仲少過覆自己，咁你會點做？會唔會即刻鬧佢咁介意做咩？定係繼續解釋你同嗰個人只係朋友？換個角度如果你不斷要求男朋友幫你影相，佢影得唔好，你一見到就黑面唔出聲。佢鬧你好煩，話唔想再影嗰陣你會點答？會唔會話佢影極都影到一Pat屎咁？定係繼續比面色佢睇？


當你明知自己理虧仲一直死撐，寧願花時間同對方拗到佢投降、道歉為止，你地感情好快就會玩完。因為你根本冇企喺佢嗰邊諗過，你只係介意自己喺呢場交既輸贏，覺得面子比起件事真相更重要。就好似七警比TVB影到打人之後仍然死口唔認罪，係咁解釋以求甩身一樣，咁睇係咪就知道自己幾橫蠻無理呢。

我明，當下一定會火遮眼，忍唔到，因為我自己本身性格都好火爆。不過自從男朋友話我好野蠻，唔知點相處之後，我先知動真火鬧交真係好傷感情。平時小小事有唔同意見係正常，動真火就唔同講法....一定要識冷靜，冷靜完就好Say sorry喇。佢會就你、道歉先亦唔代表佢有做錯，佢只係覺得你比面子更加重要，所以唔想同你死頂，執著邊個啱邊個錯，佢寧願快啲和解，諗下有咩辦法解決。若然你一直持住佢包容度高就係咁挑起紛爭，佢既愛同包容都耗盡曬，咁有日實會離開。
當然如果道理早就喺你嗰邊，你實會想一輪嘴係咁鬧左佢先算。但你又諗下既然鬧交個Moment大家都咁嬲，係咪一個適當時候去講經呢？一講經，對方會比原本更加嬲。其實你講咩都聽唔入耳架啦，點解唔等大家都停低 冷靜左先再傾？

所以鬧交又有兩點要注意：

1. 無論係咪道理嗰方都要冷靜啲先
2. 千祈唔好當街大聲鬧對方
唔好比其他人有機會放你上網笑9你，最重要係要識比幾分薄面另一半
_________________________________________________________________

如果中意我既文可以去我Instagram ：lovestoryhk
或者like我facebook fanpage：紙情
/定期更新愛情文章架，多謝支持/

_________________________________________________________________