【搵食☞銅鑼灣】⚠️窩夫迷注意 風靡萬千少女cafe

今次搵食繼續銅鑼灣，曾經風靡一時日日大排長龍嘅過江龍"Dazzling Cafe"
一兩年前台式cafe係香港大熱，好似桔梗，咖啡弄，MAMADAY呢間cafe岩岩開幕嘅時候排隊排到2個鐘以上，一向唔中意排隊嘅我緊係唔會同佢癲喇！
所以一直都未有機會試，直到而加疫情關係人流無咁多，晚市更加唔洗等位！大胃王要出動喇餐廳裝潢舒適，環境休閒清靜，有部分椅背係兔耳仔架！最適合同班姊妹SHOPPING完過黎食返個窩夫hea下嘆返個tea～
📍銅鑼灣告士打道311號皇室堡3樓313-314號舖
📱28815318 ⏰12:00 - 21:00😋好味指數😋😋😋😋／5

松露薯條🍟
薯條好幼身炸到熱辣辣脆扑扑，做到外脆內軟嘅口感，黑松露都算多，鋪滿成個薯條面層，每條都充滿黑松露嘅香味，覺得乾得濟仲可以點埋旁邊嘅黑松露酸忌廉醬或茄汁
冰河仕女伯爵🍫
呢杯冰河仕女伯爵真係超級大杯，有Kitkat同朱古力卷做裝飾，口感幼滑沙冰，至於味道方面，我幾中意佢唔會太甜，食埋頂層個cream都唔會覺得好膩。原來伯爵茶同朱古力係咁夾架
意式牛肝菌香菇意大利麵🍝
一上枱就聞到很濃郁的牛肝菌香氣，意粉份量就少左啲，不過每1啖意粉都食到啖啖嘅牛肝菌醬汁，意粉軟硬程度適中，牛肝菌同菇比例都算多同煮得夠軟腍
經典巧克力鬆餅🧇
窩夫份量十足，即叫即製熱辣辣， 散發陣陣蛋香味，色澤均勻而且脆身，再配1球香濃朱古力雪糕仲有朱古力醬同少少花生醉係面大大提升口感，簡直無得輸，成件事係完美配搭
整體黎講，食物質素算唔錯，環境幾舒適，好適合一班女仔嘆下午茶，唯一美中不足係用餐時間得90分鐘，無得慢慢傾計。