【英國零食】餅乾控┃英國超市必買好味價錢親民餅乾

我以前唔中意食餅乾/曲奇餅因為覺得好油膩同頂住個胃唔舒服嘅感覺。但係英國慢慢被呢到嘅餅乾吸引住，直頭係食上癮😇 如果你要問，薯片同餅乾2揀1嘅，我好肯定一定會揀餅乾。雖然，餅乾好高熱量又多反式脂肪多糖多牛油唔健康blablabla，不過我堅持我宗旨"要食嘅就唔好諗，要諗就唔好食"😚
餅乾係一種口痕想搵野咬嘅零食又可以頂肚餓，作為一個餅乾控，每次去超市都自自然然買一堆黎試下，今次就介紹4款英國受歡迎又親民嘅餅乾俾大家！！！
Go ahead Yogurt Breaks£1=HK$10
好味指數😋😋😋😋😋/5英國人最中意嘅餅乾，聽講每年賣出2億盒。多種水果口味(士多啤梨、森林果、紅梅、車厘子、熱帶水果)一打開包裝就聞到撲嘅的果香，脆脆嘅餅乾表面就鋪滿濃濃嘅固態酸奶，夾心係各類果乾，口感有嚼口又唔會痴牙，奶香濃厚清爽，酸甜度岩岩好，食過真係返唔到轉頭


McvitiesDigestives(Dark Chocolate)£1=HK$10
好味指數😋😋😋/5呢個牌子相信大家唔陌生，遍普世界各地，同時都係首選之一。點解？因為整蛋糕/甜品必定搵佢做餅底，當你打開包裝，陣陣麥香味散發出黎，輕輕咬一啖即刻入口即溶，濃郁嘅黑朱古力，配酥脆嘅消化餅，口感更加豐富，一塊駁一塊真係停唔到口。唯一缺點，啲朱古力好快溶會整到成手都污糟。
Lotus Biscoff £1=HK$10
好味指數😋😋😋😋😋/5COFFEE + LOTUS BISCOFF = THE PERFECT MATCH！咖啡嘅濃郁＋Lotus Biscoff獨特口味同鬆脆。 無論係點咖啡黎食定做cheesecake，一樣咁夾咁好味，食落仲有微微肉桂香氣

Fox’s Jam'n' Cream £0.50=HK$5
好味指數😋😋😋😋/5英國著名餅乾品牌之一，已經有160幾年的歷史。圓圓厚厚形狀，頂層有士啤多梨軟心果醬，中間夾住一層軟滑忌廉，食落唔會太甜或太乾

Crawford's Bourbon Creams £0.70=HK$7
好味指數😋😋😋😋😋/5未食之前對呢包餅乾已經唔太討好甚至覺得伏味濃，因為呢包係超市自家品牌產品。以往超市牌產品論質素或味道都...你懂的😉出奇地好好味完全同我想像好大出入。兩塊酥脆長方形餅乾，紮實濃濃朱古力忌廉夾心，唔會好膩，好似食緊朱古力咁

除左以上嘅品牌餅乾之外，其實超市牌都好好食，自從個包餅之後我完完全全對超市牌改觀(只限英國)餅乾控嘅你地又多個選擇喇！