【台北】隱世西門町60年炸雞老店 - 玉林雞腿大王

📌108台灣台北市萬華區中華路一段114巷9號
📱+886 2 2371 4920 ⏰11:00 - 21:00
😋好味指數😋😋😋😋／5
今日要同大家介紹一間位於台北西門町有60年老字號炸雞腿便當，原來已經承傳第三代，平時去西門町第一時間係咪搵雞哥買鹽水雞之後整返盒骰子牛再加杯苦瓜大王嘅蜂蜜白苦瓜汁清下熱氣呢？去過咁多次西門町成日食連鎖式嘅炸雞真係無乜驚喜，只有一次嘅一次失望。如果無人介紹真係唔知有呢間脆扑扑，60年老字號炸雞店。講返餐廳環境先，雖然門口睇起黎舊舊地又唔起眼，但尚算乾淨而且有冷氣，仲有一種古早風味。
雞腿飯
即叫即炸大大隻炸雞脾，一啲都唔覺得好油，而且多汁厚實雞脾肉配甜而不膩嘅秘製祖傳醬汁，好香脆雞脾同飯分開上，配是日青菜，滿滿嘅椰菜加粒滷豆腐，飯上面有少少肉燥撈飯。
單點炸排骨
排骨有經過拍打、按摩等軟化工序，所以食落去唔乾又唔韌，唔洗擔心攝牙罅嘅問題 整體黎講，炸雞腿好出色，排骨都炸得好酥脆，如果想試新野唔想食連鎖店炸雞可以去玉林雞腿大王試試