#Nj評《自殺特工：超能暴隊》－收貨啦邊有咁差

寫文之時，《Suicide Squad》於Rotten Tomatoes仍然得26%。我帶著零期望入場（一半俾BvS嚇親一半俾劣評嚇親），睇完覺得ok喎，無其他人講到咁差。好多人用《Deadpool》比較，我個人幾奇怪，覺得《Deadpool》有些地方幾好笑外其實主劇情一般，反而《Suicide Squad》玩得還更有趣。來到這裡，繼續評論漫畫改編電影便很需要利益申報，非DC非Marvel迷，從未睇過漫畫，曾經大力踩過《Batman v Superman》，曾經大力讚過《美國隊長3》。這次我讚DC作品，應該無可疑。
事前睇到評論差成咁，入場前已經諗好影評標題要包括叫DC『收手』，最後發覺比預期中好，想幫手平反而一字之差改成『收貨』。好多人形容電影有形無神，我就未睇過原著真係唔知應有神髓係點，電影俾幾多我就接受幾多。爛番茄大力劣評的似乎好多是DC fans，最後另一批DC fans又好想反擊就要求杯葛關閉爛番茄。有時真係無辦法，這電影天生係有缺憾，不像Marvel般每個角色都有獨立電影去支撐。一套戲咁多角色實係兩頭不討好，一係太重點兩三角色忽略其他，一係全部都忽略，我意見是依家算係平衡得好。純動作又會俾人話冇意思無感情，加深每角情感又話惡人唔夠惡，班壞人主角背後故事如果可以勉強成為組隊原因其實都無壞，係無啦啦行入酒吧談心真係幾兀突。

個劇情都ok啦，成套戲最惡的黑鬼婆控制貞子幫自己，順便集結埋其他奇人，點知貞子失控搞鑊大單嘢，黑鬼婆唔係叫班人打救世界而係救自己，又頸植炸彈講明如果軍佬死就一鑊熟，一直打打打打到黑鬼婆都唔見埋軍佬先講原來大佬貞子係自己女友，跪求各位幫手，咁佢地嬲嬲地就去咗談心做fd交換facebook，最後都係幫手砰砰砰打勝仗，貞子還魂回歸軍老懷抱。其實劇情都幾順暢，黑吃黑吃黑，大部分動機邏輯勉強解釋到（呢啲戲我真係唔要求太多邏輯，勉強就得）。唯一入酒吧懺悔，真係令人發笑。仲有一些解釋劇情係好破碎，例如軍佬落地鐵放炸彈又唔知點樣被貞子背叛，黑鬼婆好似有陰謀又好似唔係。加上最為人詬病的奸角太弱，明明差不多毀滅整個世界但輕易被Suicide Squad打敗。飛機火箭炮導彈都射不死奸角大哥，偏偏一個埋在下層的炸彈能夠解決。軍隊用槍射不死變種士兵，Deadshot可以，即使是棒球棒都可以。不過，算啦，我覺得冇乜所謂，睇得開心就得。
角色方面，係，我認描寫可以更詳細，不過趕時間下簡化版背景描述都睇得算投入。終於明白Will Smith點解終於肯出山再拍呢類型電影（佢連代表作《天煞》續集都唔拍），因為，原來Deadshot角色真係好Will Smith，親子，慈父。睇番Will Smith近年作品《The Pursuit of Happiness 》《After Earth》，就明佢鍾意揀邊類戲拍了。Deadshot係大奸人殺手？忘記佢啦，好爸爸來的。小丑女與小丑，這一pair我睇得好入神。小丑女學咗小丑乜都係玩笑乜都唔怕亂講嘢，佢出去當呼吸下空氣等愛人營救好合理。而小丑，現階段好難評論演得好還是壞，因為片段實在太散，佢今次都係作為配角幫補下副線劇情。未來需要勁揪編劇為小丑寫下詳細劇本，才知道新MK風格小丑有沒有善用好演員。至少，見到兩個癲人走埋一齊，好有愛。火佬超越我預期，事前我諗呢個人咁大能力可以搶過其他角色。不過設定上有落心思，講佢已經悔過內疚死都唔肯出招，就有機會俾其他幾位主角演嘢，到最後關頭犧牲自己打大佬效果都算幾理想。鱷魚佬，其實佢好慘喎，天生皮膚病就俾人捉咗，咁樣俾人折磨法你都想打人殺人啦。至於迴力鏢隊長，算啦，出下口術玩下航拍機，讓死敵閃電俠有得出場。日本妹，唔係好知做什麼，不如連僅有少少背景都唔洗講，無啦啦影佢對住把愛刀喊其實幾毒。貞子，好正，話緊佢玩魔法果時，隻手好似痙攣。
其實真係冇乜嘢挑剔，我要求已經降到最低，大把戲仲亂龍過佢我唔會淨係針對佢嘅。有明星睇，有蝙蝠俠閃電俠，有勁歌靚畫面，睇呢啲戲夠爽咪得囉，反正我又冇漫畫包袱。

70分
文：Nj

－－－－－－－－－－－－－－
░電影資訊 ░獨家影評 ░幕後製作 ░戲院優惠
Fb專頁【 電影狂人-影評情報交流平台 】
http://www.fb.com/MovieMadMan
▲歡迎影評投稿－分享交流！
－－－－－－－－－－－－－－