【#Nj評《與神同行》】中段拖戲無癮都好睇？結局情感大爆發先救到套戲

《與神同行》受歡迎程度票房超越《屍殺列車》，講到特技比得上荷里活，劇情感人肺腑將韓國片提升到另一層次個個喊住離場。睇完，我深深理解到一部電影的結局有幾咁重要。當一套戲明明本來大體都拍得幾好，一個虎頭蛇尾或者直頭稱得上爛尾的結局足足俾人記一世，前面拍得幾平衡都冇用。倒轉，明明前面都ok難捱，個結局又政治正確大道理幾感人就無人記得先前不停望錶的苦況，離場當然會周圍話俾人聽自己喊濕幾多包紙巾，大讚好睇好好睇。電影一開頭的消防意外簡單直接，好快就講男主角被地獄使者接走進入新世界。然後一路行一路講七層地獄及輪迴轉世的概況，雖然感覺好機器式介紹不過還可以，只求快快脆脆進入正題。開頭出現不同地獄環境，奇幻動作齊備係幾得意，但越來越發覺好似每關都幾刻意曬特技，漸漸覺得好抽離唔夠真實感又模糊了故事。一關又一關前進，基本上越來越悶，每關開頭都話主角有錯，俾地獄使者講兩句判官就心軟放人，根本無懸念無難度觀眾又點會看得肉緊投入。劇情剪接安排上其實都見問題，中途無啦啦一位地獄使者離開去查案，所謂重組案情都只是俾個藉口直接放映另一邊先前發生的事給觀眾看，當中無懸疑無解謎。兩條線大部分時間各有各做，聚頭之時就係我最怕嘅打到龍珠飛天遁地。睇到眼都花唔知打緊乜，以混亂來製造緊張刺激。.
以上講的都係節奏控制不當，新鮮過後中段拖戲沉悶無癮，久久未能進入正題。足足七層地獄的設定明顯是個錯誤，所以大家可以見到尾段已經玩到冇得再玩盡量簡化甚至忽略。假如劇情中多加地獄使者的過去描寫（有，但不深刻），反而可使故事更豐富。去到電影尾段終於觸及到主題，孝子自省情感大爆發，講到尾其實都只是一個好簡單的道德親情小故事。當然，主角車太鉉一臉好人孝子的樣貌，細佬又咁唔好彩突然有意外，配合戲中母親楚楚可憐，真係幾感人都難怪大家眼濕濕。又其實，這樣的倫常慘劇一直都是韓國最拿手的一環，只是稍為披上動作特技包裝，《與神同行》贏得未算精彩。
.
70分
文： Nj
.
多謝 電影圈 & 安樂 邀請參加優先場
.
*讚好專頁【 電影狂人-影評情報交流平台 】緊貼最新電影資訊！***
－－－－－－－－－－－－－－－－－－
░電影資訊 ░獨家影評 ░幕後製作 ░戲院優惠
Fb專頁【 電影狂人-影評情報交流平台 】
http://www.fb.com/MovieMadMan.
*追蹤instagram【 madman.movie 】有你著數！

*// https://www.instagram.com/madman.movie/ //