【#Nj評::〈日間演奏會散場時〉】 經歷與苦難都是成就藝術的根源

對日本偶像一向沒有什麼認識，男的只懂藤原龍也及松山研一（全因《死亡筆記》）以及傳奇級的木村拓哉及福山雅治。〈假面酒店〉本來都冇乜興趣，但木村拓哉吸引，就睇下，都唔錯但唔算話好好睇。〈#日間演奏會散場時〉有福山雅治，又睇下，正喎！留意，這句『正喎』係我覺得好睇，又未必係你覺得好睇。.
要認真探討劇情，超多問題，好老土喎真係。不評論有無可能見過兩次面便深愛對方，男的想追求已訂婚女人，女的為這個男人放棄未婚夫，又唔可以話無可能，始終還有解釋些周邊因素。最大問題係令他們分開的原因，點講都講唔通，有人從中作梗產生誤會便多年不見。相當兒戲，至少在資訊發達的21世紀肯定不可能。反而如果套戲發生在戰後，亂世佳人，可能又OK，簡單講就係玩到咁同50年代故事有得fight。一段婆媽劇情，為本來包裝得很好的一部戲添加了污點。


用愛情方向去睇，兩位中佬中女望落都算夾，但未話成就到經典，講婆媽老土又一定唔夠韓劇勁。反而可以傳奇音樂家的中年期傳記角度去睇，其實又好到位。一位被愛情耽誤的音樂家，還是一段被藝術耽誤的愛情？故事中有人去爭取所愛嘗試開展新生，有人不惜一切為欣賞的人製造最好的環境發揮技藝，兩者都沒有對錯。而這故事、人設正好融入相當文學的意識，由未來可改變過去，發展到經歷與苦難都係成就藝術的根源，有時痛過回頭再看會有不同看法。可能有些對白講出來會有點外露，可能原著小說文字會表達得更好，但還是十分欣賞。
.
故事安排可能真係有提升空間，但意義如上文所講係感動到我，更加讓人投入的是整部戲落足本絕對養眼。日本、法國、美國取景，數個演奏會場景華麗真實，係用銀彈、心機及堅持去拍。角色亦非常適合福山雅治去演，不是個個演員懂結他，也不是人人可以把古典結他手的形象演繹得那麼優雅具說服力。你可看到他自信、熟悉樂器的一面，親自彈奏散發出來的氣質無人能及。還有，電影內有非常多好聽歌曲，視聽配合呈現都非常令人享受。
.
同場加映：
★加入狂友fb群組【 #狂氏電影綜合症候群 】★*// http://bit.ly/32xJWLp //
★直接交流 × 傾講電影有你帶頭！