【最近好嗎】齊齊打護級！彭利拿心繫紅魔；贊奴沙兼學防守

同樣都係護級份子，贊奴沙就留喺英超，幫前曼聯主子莫耶斯爭取護級成功，不過同彭利拿有啲唔同，贊奴沙打得有啲辛苦，成季都係入得一球波(仲要唔喺聯賽入)，又只得3個助攻，成績就麻麻哋；而新特蘭自己亦唔見得好，28場波20分排聯賽包尾…當然，作為大家睇好嘅明日之星，咁嘅表現自然惹嚟批評。佢都講，打頂級班同打護級隊真係好唔同。

佢咁講：「真係好難，我依家防守工作做多好多，尤其係我哋好依賴反擊，反擊意味你前面會有3個甚至4個球員圍住你，要喺咁嘅情況下交出致命傳送真係唔易。我可以講係其中一個最有威脅嘅球員，不過我依家會防守行先，攻擊慢慢再諗。我試過打曼聯，我好明白榜末球隊會點樣迎戰強隊，而我就係做緊同一件事。」
當佢去德國時，有人講過佢嘅精神唔夠強韌、態度唔夠積極，令多蒙特忍唔住唔用佢。但係佢就梗係講，自己好堅持、明白自己要跑好多同埋加強身體對抗性，而且要好專注於足球先可以。只係呢一刻，佢固然唔係幾幫到新特蘭手；返去曼聯亦似乎唔會有咩運行，如果仲唔可以有啲咩突破，下季仲見唔見到佢都係未知之數……