你尋日追咗「星」未？(附星仔訪港短片)

各位紅魔粉絲尋日有無追「星」呀？咩星？當然係追星仔朴智星啦！上月第19次贏得英格蘭頂級賽事冠軍後，尋日星仔就來香港同一眾曼聯球迷見面，仲帶咗啲好重要嘅東西來！就係英超冠軍獎盃喇！如果你無追「星」都追「盃」都唔緊要，係呢到一樣可以重溫人山人海的情況！

其實行程真係好緊密，星仔星期三深夜先抵港落地，10點半就要係灣仔君悅酒店為MUTV做咗半個鐘的記者會同宣傳，真係唔簡單呀！之後更馬不停蹄，去到中環HMV為買咗曼聯賽季回顧DVD的粉絲簽名。聽聞當時仲有球迷用韓文歡迎「星仔」，更為佢高唱曼聯會歌，令星仔笑到見牙唔見眼！
星仔訪港最後一站係去尖沙嘴曼聯餐廳食飯，不過唔係自己食，而係同紅魔粉絲一齊食！不過個餐就要880蚊，而且都坐唔到係佢身邊勒！抵唔抵就見人見「智星」勒！完咗晚飯，星仔好似完全唔想行下街買下嘢，當晚就返咗首爾勒，唔通返去搵緋聞女友金妍兒？定索菲呢？