曼聯專區小評：莫帥，請由球員角度諗隊波
仲有12場波，要攞多12分先可以躋身前四，仲未對利物浦、曼城…所有數字，都表示歐聯的資格已經越來越遠。換領隊從來都對球隊有好大影響，而今季的曼聯確切的以身作則，俾大家知急換將的結果。
截至富咸的比賽之前，莫帥點將之下，24場比賽已經有83個變陣，每一場比賽都好似出奇蛋咁，你永遠唔會知莫帥出咩人。單單睇中場中，已經有13個唔同組合試過，當然卡域克、費蘭尼的久傷令莫帥難以用兵確係原因之一，不過前線的組合佢好似永遠都在試陣一樣，除了馬達成魔之後，恰巧朗尼、雲佩斯又傷癒，所以呢兩場波都有比較固定的鋒線人選。而呢個較穩定的陣容，亦令曼聯表現有啲啲改善(真係好啲啲)，最少雲佩斯對阿仙奴一場波都有幾個黃金機會，比之前的狂斬中製造零機會好。你話點先可以改善？其實，莫帥唔應該再以一個領隊的身份去諗，應該用球員的身分去諗，由最基本出發。
第一，你作為球員，周圍的隊友一時一樣，成日唔同，咁樣係唔可能有默契可言。好似贊奴沙，佢係就係打得好，不過只係季中試過長佔正選，依家又俾返楊格打。兩個人的打法其實好唔同，惟一相同之處可能係一樣鍾意插水 (=.=) 不過贊奴沙就以個人突破能力為主要武器，楊格就喜歡落底、cut入中路中距離射門的打法，當然，最近就連cut入中路都無埋，只係左路一路推到底斬波…作為隊友，要適應兩個完全唔同走位方式嘅隊友，係需要時間去微調、去夾。所以，作為落場踢波的球員，最想見到嘅當然係周圍的人腳總係差唔多，起碼隊友喜歡走嘅位、喜歡嘅打法我都清楚，咁先有機會造就攻勢，亦即係默契大於能力的講法。
第二，作為球員，尤其係年青時打防守球員出身嘅莫耶斯無理由唔知道自己最驚邊一種攻擊方式。大腳斬往往係最易防守的一套套路，因為防守球員都係守株待兔，企定定在禁區就已經無問題，有咩失位都唔怕，因為總有隊友在身邊補位。最難防守的，是難以足摸的走位、讓對手估你唔到，唔知你想推進定交波。你緊逼攻擊球員？佢可以速度爆過你，你就少一個守將；佢可以交波俾走緊位嘅隊友，你又要派人去守。多一個人，又多一倍變數，最後全個防線被拉鬆哂，人人失位無人補，對手就可以予取予求。講就易，因為要做到走位難以足摸係需要好強的用波能力，唔係隊隊都得。不過，有雲佩斯、朗尼、馬達、贊奴沙，用波能力一時無兩，點解唔發揮佢哋嘅優勢？
第三，作為球員，你會好睇到隊友的優點。馬達搶截唔係好強(香川都係)，不過短傳一流(香川都係)；馬達打右面其實無咩波踢，用唔到佢攻擊自由人嘅特長(香川都係)；雲佩斯腳下功夫一流不過高波佢用唔到等等等等。作為隊友，你會好自然配合，會交地波俾馬達等佢變魔術(香川都係)；會交中腰波俾雲佩斯做怪腳射門；會喺娥眉月俾波朗尼做霸王式中距離射門；而攻擊嘅時候就唔會交波俾雙卡，因為會回後。既然都已經有自己一套，點解唔去強化而係強行引入自己一套？
第四，心理質素其實都好重要。你作為球員，如果領隊成日話要買人、要換將，即係表示你唔得、我唔想要你、有人好過你、我手上無牌可用。俾你聽到，你會點？我都心灰啦！所以，莫帥唔應該再話自己要大手買人，就算真係搵緊人都要低調啲，起碼唔好自己去睇比賽。爵爺夠成日話自己唔買人啦，最後咪一堆楊格、華倫、包維？一旦球員的心理失控，佢嘅表現一定下滑，明明可以有八成，佢都只可以打出五成功力。咁你話點算？要買，都要買得細聲啲。
依家嘅莫帥就好似大老闆一樣，無由bottom up咁去諗自己隊波，反而以為自己打緊football manager，有錢有權可以以本傷人、將最強人腳炒埋一碟就會贏波。如果真係咁樣，同一眾球壇新土豪有咩分別？爵爺的可愛之處，就係可以將卡華利用到好似史高斯咁嘛！
卡華利：拿拿拿，你咁講嘢嘅？
截至富咸的比賽之前，莫帥點將之下，24場比賽已經有83個變陣，每一場比賽都好似出奇蛋咁，你永遠唔會知莫帥出咩人。單單睇中場中，已經有13個唔同組合試過，當然卡域克、費蘭尼的久傷令莫帥難以用兵確係原因之一，不過前線的組合佢好似永遠都在試陣一樣，除了馬達成魔之後，恰巧朗尼、雲佩斯又傷癒，所以呢兩場波都有比較固定的鋒線人選。而呢個較穩定的陣容，亦令曼聯表現有啲啲改善(真係好啲啲)，最少雲佩斯對阿仙奴一場波都有幾個黃金機會，比之前的狂斬中製造零機會好。你話點先可以改善？其實，莫帥唔應該再以一個領隊的身份去諗，應該用球員的身分去諗，由最基本出發。
第一，你作為球員，周圍的隊友一時一樣，成日唔同，咁樣係唔可能有默契可言。好似贊奴沙，佢係就係打得好，不過只係季中試過長佔正選，依家又俾返楊格打。兩個人的打法其實好唔同，惟一相同之處可能係一樣鍾意插水 (=.=) 不過贊奴沙就以個人突破能力為主要武器，楊格就喜歡落底、cut入中路中距離射門的打法，當然，最近就連cut入中路都無埋，只係左路一路推到底斬波…作為隊友，要適應兩個完全唔同走位方式嘅隊友，係需要時間去微調、去夾。所以，作為落場踢波的球員，最想見到嘅當然係周圍的人腳總係差唔多，起碼隊友喜歡走嘅位、喜歡嘅打法我都清楚，咁先有機會造就攻勢，亦即係默契大於能力的講法。
第二，作為球員，尤其係年青時打防守球員出身嘅莫耶斯無理由唔知道自己最驚邊一種攻擊方式。大腳斬往往係最易防守的一套套路，因為防守球員都係守株待兔，企定定在禁區就已經無問題，有咩失位都唔怕，因為總有隊友在身邊補位。最難防守的，是難以足摸的走位、讓對手估你唔到，唔知你想推進定交波。你緊逼攻擊球員？佢可以速度爆過你，你就少一個守將；佢可以交波俾走緊位嘅隊友，你又要派人去守。多一個人，又多一倍變數，最後全個防線被拉鬆哂，人人失位無人補，對手就可以予取予求。講就易，因為要做到走位難以足摸係需要好強的用波能力，唔係隊隊都得。不過，有雲佩斯、朗尼、馬達、贊奴沙，用波能力一時無兩，點解唔發揮佢哋嘅優勢？
第三，作為球員，你會好睇到隊友的優點。馬達搶截唔係好強(香川都係)，不過短傳一流(香川都係)；馬達打右面其實無咩波踢，用唔到佢攻擊自由人嘅特長(香川都係)；雲佩斯腳下功夫一流不過高波佢用唔到等等等等。作為隊友，你會好自然配合，會交地波俾馬達等佢變魔術(香川都係)；會交中腰波俾雲佩斯做怪腳射門；會喺娥眉月俾波朗尼做霸王式中距離射門；而攻擊嘅時候就唔會交波俾雙卡，因為會回後。既然都已經有自己一套，點解唔去強化而係強行引入自己一套？
第四，心理質素其實都好重要。你作為球員，如果領隊成日話要買人、要換將，即係表示你唔得、我唔想要你、有人好過你、我手上無牌可用。俾你聽到，你會點？我都心灰啦！所以，莫帥唔應該再話自己要大手買人，就算真係搵緊人都要低調啲，起碼唔好自己去睇比賽。爵爺夠成日話自己唔買人啦，最後咪一堆楊格、華倫、包維？一旦球員的心理失控，佢嘅表現一定下滑，明明可以有八成，佢都只可以打出五成功力。咁你話點算？要買，都要買得細聲啲。
依家嘅莫帥就好似大老闆一樣，無由bottom up咁去諗自己隊波，反而以為自己打緊football manager，有錢有權可以以本傷人、將最強人腳炒埋一碟就會贏波。如果真係咁樣，同一眾球壇新土豪有咩分別？爵爺的可愛之處，就係可以將卡華利用到好似史高斯咁嘛！
卡華利：拿拿拿，你咁講嘢嘅？