雲高爾記者會：迪基亞唔走 朗尼知恥近乎勇

一次過失去奧達文迪、柏度畀2大英超球會之後，雲高爾似乎唔太在乎(或者係無得在乎)，喺記者會中指隊伍唔一定要再買人：「我哋有28個球員在陣，隊伍的平衡已經好好多，咁當然啦一定有空間改善嘅。我哋會用自己的方式變好，而唔係用其他人口中嘅方法：不惜一切買球員嚟。我哋只會買能夠貢獻隊伍的球員。依家每個位置都有2個選擇，除非有得更進一步，否則無必要再買。」

而雲帥亦提到，曼聯唔係對好球員無吸引力，要嚟曼聯的總會嚟，不過球會賣唔賣都係影響因素之一，就正如紅魔鬼自己，亦唔打算出售迪基亞一樣。而之所以唔畀佢出陣，係因為皇馬對佢嘅「追求」已經令佢無辦法集中，咁樣會影響表現。究竟呢個僵局會點發展？雲帥會唔會話唔賣又賣呢？
對於朗尼，雲高爾嘅講法就真係好牽強喇…佢話朗尼一樣會正選對紐卡素，原因竟然係：「我諗一切由球員出發，如果你肯同傳媒講自己打得好差，即係你知自己真係非常非常差啦，不過一個球員肯承認已經好好。對我而言係不可思義，因為好少球員可以知恥近乎勇，佢應該好清楚咁講會帶來傳媒的壓力。如此發言要冒一定的險，同時亦表現出佢有信心可以重拾狀態。佢知我要咩，佢知我嘅哲學，佢知我要前鋒交咩貨。我對佢好有信心。」

結論就係，朗尼應該都會正選架喇。雲帥話佢試過朗尼打好多個位，不過2人都認為打最前最適合朗尼。呢個又係唔係真呢？筆者就認為打10號輔鋒位最啱佢，因為佢又喜回防、又可以用身體抗性為正前鋒帶來掩護，你又點睇呢？