曼聯專區小評：國際賽真係好需要運氣！

其實一個國際賽周，對於好多球員而言都係唔開心多於開心，就連雲加自己，都話：「我依家只可以好好祈求球員可以無事咁由國際賽返來，因為我哋人腳真係唔多架喇…」而好嘈嘅鄰居曼城睇嚟真係最傷嗰個，因為國際賽已經令佢哋兩員大將傷咗，分別係阿古路同埋大衛施華，咁就可以見到國際賽有幾恐怖。曼城對親曼聯，阿古路總係有啲入波門路，不過依家佢估計為國家上陣引致大腿肌肉受傷，呢啲傷抖返一個月先好係好正常，即係話曼市打吡應該好難見到阿古路喇。另一方面，腳踝受傷嘅大衛施華都應該要休息二到三星期，要上陣打呲戰亦有一定難度。
所以，少咗上陣國際賽，真係隨時利多於弊。好似朗尼咁，佢早排參加英軍操練時受傷，已經無喺對愛沙尼亞嘅歐國外上陣喇。而周一對立陶宛嘅比賽，朗尼甚至連飛都無飛過去，三獅會由菲臘積基爾卡做住隊長先。咁睇，朗尼好似傷勢唔係好輕咁，而國際賽似係都影響緊曼聯，不過呢個好可能只係表面，因為無打2場國際賽對朗尼而言係有休息時間，skyports已經收到風，朗尼好大機會會在周末復出！咁即係意味住，接下來對莫斯科中央陸軍同曼城，都有機會可以見到朗尼，先唔講佢出陣對曼聯好定壞，多個健康球員對球隊點都係好事。

邏輯就係咁喇，無上陣嘅就身體好咗，有參與國際賽嘅就有危險…好似小豬舒韋恩史迪加就因為熱身時受傷未有上陣對愛爾蘭嘅比賽，而佢好成點亦未有咩特別消息，大家可以預佢唔會對愛華頓先…有朗尼、無小豬，會唔會令中場又差咗？咁大家都可以放心嘅，靴里拉同盧祖都已經話自己操返喇，對拖肥應該有機會上陣嘅！只係國際賽喇wor…都真係幾危險架…