第一滴血！馬達職業生涯首張紅牌

可能好難接受，不過原來馬達被逐呢張紅牌，竟然係佢人生第一張！佢咁講：「作為職業球員，我有過500場比賽，不過上星期日領紅其實係我職業生涯第一次。所以你可以想像到，我其實好難先可以表達自己嘅感受。對我而言，呢個情況既係第一次，亦令人感覺好奇怪，唔容易消化，不過人應該要由所有事情當中學習。我知，足球嚟講紅牌唔難見，個個星期都有。只係要自己隊友以寡敵眾，實在令人心傷。」

「個人感覺，2個黃牌都係有啲過嚴，好多更嚴重犯規的情況下球證都唔會出示黃牌。當然，2個黃牌我都係可以避免嘅，所以我承認我有責任。對遠赴西布朗睇我哋比賽嘅球迷而言，呢個都唔係一個好結果，對留在家中看比賽的球迷亦一樣。我會繼續努力，集中下場比賽、集中歐霸對陣利物浦的大戰當中。」
唔單止係馬達個人第一個紅牌，呢張仲係曼聯本季第一紅，真係陰公豬豬…有時啲嘢真係神推鬼擁，你見上半場曼聯個個球員都有啲游魂，交波交失唔再講，走位又怪怪的，最舒服竟然係見到卡域克推波上中場，因為你知控球權只有在推波時先可以keep到，就知呢場波都係輸多贏少…而馬達的古怪行為，亦只可以話係一時波瘟…

至於佢會唔會在歐霸中上陣，雲高爾睇嚟都仲對佢有信心：「球證要熟悉犯規人嘅性格，好似馬達咁佢就從未試過整傷任何一個對手球員。你可以話2個黃牌都係跟足球例，不過我只可以講，球員的品性都應該係考慮的原因之一。」馬達睇嚟一定會喺呢件事上學到嘢，有成長，對利物浦一戰如果有機會一定要再次表現自己！