伊巴：我愛曼市多過巴黎

伊巴效力過眾多球隊，亦轉戰過不少國家，馬模、巴黎、巴塞、米蘭都生活過，究竟佢喜歡邊個地方最多呢？當然啦，答案呼之欲出，就係曼市喇！

佢咁講：「我未嚟之前聽好多說話架喇，又話曼市呢樣唔好嗰樣唔好，又話佢天氣咁咁咁之類。不過我感覺到依家為止，所有事都幾好噃。對我嚟講呢個城市暫時係我去過最好嘅地方，我來自瑞典，在足球之外我嘅要求其實唔高。我好簡易，我係一個家庭為重的人，好似我喺巴黎住咗四年，一次都未去過巴黎鐵塔囉。佢哋又唔肯將鐵塔轉做我個雕像，如果佢哋依家回心轉意我可能會去一次都唔定！」哇，真係好「簡單」噃你！
但係佢都提到，自己喺曼聯都錯失幾多入波機會。只係英超比賽其他聯賽唔同，伊巴形容為「拳來腳往」，無一隊可以完全控制比賽，通常都係我攻一輪，你又攻一輪，佢真係要啲時間去適應。而佢都有信心可以為球隊作更多貢獻。

其實，佢呢一番說話好明顯就係同紅魔球迷講嘅，佢點會無去過巴黎鐵塔呢？當年佢加盟巴黎聖日耳門，個記者會咪就係喺巴黎鐵塔舉行囉！如果佢話「去過巴黎鐵塔」係上過去的話，咁佢可能真係無去過都唔定嘅….