[理性文字分析] 英超護級形勢

當英超冠軍塵埃落定後，焦點必定轉移到護級大戰上

現時只有維拉篤定降班，有三隊徘徊係護級漩渦之中，分別係紐卡素，新特蘭及諾域治。

論近況，諾域治較差。原本諾域治係較有機會護級既一隊，但近三場比賽全敗；相反紐卡素近4場2勝2和得8分；新特蘭近3場1勝2和得5分。此消彼長下令護級形勢大逆轉，紐卡素以33分暫時脫離降班區，新特蘭及諾域治僅以32分及31分緊隨其後。

但紐卡素多打一場，餘下賽程有作客對維拉及主場對熱刺。維拉已經錄得11連敗，眾將根本無心戀戰，只求希望盡快完給離隊他投，上仗被屈福特反勝已證明一切。而熱刺已經宣佈爭標無望，普捷天奴會否派副選應戰呢？還是希望埋個靚齋？講真，賓尼迪斯的確有實力，近幾場紐卡素慢慢上力打出水準，到時要守和熱刺都有可能。
雖然新特蘭及諾域治都多打一場，但兩隊下場分別主場面對車路士及曼聯。車路士雖然無慾無求，但要戰勝新特蘭亦不難，新特蘭應先以1分為目標，因為只要1分就足以升上17位。

至於曼聯為保爭前四希望必定全力搶3分，諾域治要全身而退的確有困難。

有趣既係新特蘭及諾域治最場兩場對手都係愛華頓與屈福特，兩隊都不易食亦有機會偷雞，難分難解。

總之三隊只能活一隊，而且紐卡素與新特蘭係英格蘭北區世仇，任何一隊降班而另一隊護級成功都必定被另一隊球迷所恥笑，所以這是一場榮耀之戰！！



facebook page: 理性足球分析