Aubameyang加盟阿仙奴 - 「有前」
有前
阿仙奴正式宣佈Aubameyang由多蒙特加盟，轉會費可能達到5千6百萬，送走一個Sanchez換黎前多蒙特孖寶，照牌面睇好似幾抵玩。
連季初加盟既Lacazette，今季買左2個前鋒1個攻中，加埋Ozil的話其實都幾好J既，唔知雲加又會點玩？放晒4個落場有冇得諗？
而家有前啦，咁後呢？
剛剛輸完俾榜尾史雲斯，唔係當無事發生過掛？Xhaka既防守能力大家都有目共睹，雲加繼續出佢唔知有咩用意。近兩場用Elneny加強防守係明智既選擇，聯賽杯擊敗車路士就係例子，而Wilshere就係阿仙奴近期換番4後衛既得益者。Wilshere既復出同爆發梳理好阿仙奴既中場，佢個種視野、節奏、技術，係呢幾場完美咁表現左出黎，就係因為佢身後多左Elneny幫佢，令佢唔洗回得太深防守。大家睇番3後衛時中場係Wilshere加Xhaka，兩個都唔識守既時候...今場對史雲斯無左Wilshere即刻失分，我唔敢話係因為佢，但絕對係因素之一。
https://youtu.be/6rEoM8_y4vA
https://youtu.be/JAXr_wHXdL8
我亦相信無病無痛下，Koscielny搭Mustafi仍然值得信任。
講番轉會，防守球員今季除左免簽Kolasinac外就無其他，仲要賣走左Coquelin、Gibbs同Gabriel。最得意係以為玩3後衛所以無位俾Coquelin打，點知賣左之後又玩番4後衛出Elneny，真係有d黑人問號。
黎到轉會窗最後一日，都唔會諗阿仙奴會再有咩收購，只係唔知銀河唯一Giroud會唔會走。
以而家既陣容，前線有Mkhitaryan、Aubameyang、Ozil、Lacazette，加埋Welbeck同Iwobi，牌面上唔似中游既...攻擊力唔太令人擔心，但究竟work唔work？真係要睇多幾場先評論到，以Aubameyang既身體質素要適應英超應該唔難。
Mkhitaryan講過話終於可以打進攻足球，無可否認阿仙奴既踢法岩佢，加埋Aubameyang，都幾期望見番生猛既Mkhitaryan。
不過近排見Ozil入波或者助攻，同隊友慶祝時心事重重，提唔起勁咁，係有d似之前既Sanchez...
講咁多，最後都唔該搞好個防守問題先，有前無後既打法，當你見到曼城用幾億去換過晒條後防，利物浦用7500萬買個中堅，就知道而家防守係幾重要。