曼聯對利物浦 賽後短評

Pogba突然受傷缺陣，臨時的變陣反而更有效？
利物浦433的打法大家都很熟悉，前面三箭頭置中，把對方防守拉入中路，邊路空間留給兩閘後上。上一場對紐卡素三箭頭的走位便令紐卡素後防犯錯而入波，但今場曼聯卻有針對性部署。

球迷都知道利物浦打法，摩連奴又點會唔知？將4人防線收入中間係一定要做，問題係兩翼要積極回防防守兩翼。賽前諗過433既話，Sanchez個一邊有可能回防不足而被打爆，但點知Pogba唔出得後轉4231，Rashford打左邊反而更好。因為Mata同Rashford都好勤力會回防，Rashford後生會聽摩連奴指示縮後，特別係下半場曼聯直情打6人防線咁。所以利物浦就算空有控球權，但真正有威脅埋門少之有少。最估唔到Sanchez打中間又肯回防，仲多次回到禁區頂搶到波，將Sanchez拉落一格對付番利物浦既3中場亦都係摩連奴既部署，留番Lukaku一個係前面頂住。

其次曼聯近幾場已經玩放棄控球，今場當然唔例外。曼聯攞波時唔多冒險，一有壓力就回後，最後回俾D.Gea就大斬俾Lukaku頂，今場兩個入球都係咁黎。Lukaku迎頂將Lovren從防線拉出黎，造成Arnold同Dijk中間有空位，第一球Rashford成功攝贏Arnold入中間起腳，第二球同樣拉出Lovren，Arnold今球醒左逗後，所以Mata入攝空位時無咁大位被刪走，可惜個波去左Rashford腳下，有少少輸運。呢兩球好似以其人之道還治其人之身，有睇上條片引蛇出動既話，利物浦就係最擅長拉出人地個中堅，再利用其身後空位，呢兩個失球正正就係咁失。
講開拉走中堅，曼聯今場一對中堅面對Mane或Firmino既回後擓波，極少跟出去，Bailly同Smalling首要任務係保持防線完整性，呢樣亦睇得出事前有練過。曼聯係特登讓Mane或Firmino係中場攞波，俾你轉埋身都無所謂，因為前面根本無位俾你去，等Mane或Firmino轉身時，Matic同McTominay已經回防，企係你面前。Salah係比較少回後，長期係右邊但竟然被Young Mark死，真係估Young唔到。中堅間無空位俾Salah入就毫無用武之地，無空間俾佢發揮。

當要利物浦圍攻既時候，真係無咩板斧。利物浦最殺食係反搶，反搶完之後可以立刻從敵人半場進攻令對方防不勝防。但曼聯完全唔俾機會利物浦反搶，就好似上面講咁打安全牌，唔冒險，全部回後俾D.Gea大斬，唔俾機會利物浦係曼聯半場發動攻勢。曼聯話：你想攻呀？係你個邊造過黎啦，我地係呢邊等你。

當曼聯領先兩球當然立即泊大巴，Bailly球烏龍亦非戰之罪，不過如果佢當時傷出就真係唔同玩法。

其實全世界都知道曼聯會以防守為主，高普理應知道，與其話摩連奴泊大巴，不如問高普點解好似無對應既破解方法？反而被曼聯先入兩球？