歐聯8強次回合 曼城對利物浦 賽後短評

首回合利物浦領先3比0，傻既都知曼城一定全力搶攻。最後哥迪奧拿排出3後衛既陣，幾乎放晒所有攻擊球員入場，誓要追番3球差距。相反利物浦Henderson停賽Can收咧之下，只能用Wijnaldum打防中位，當然表現未如理想。
開波1分鐘曼城就追番一球，當時v.Dijk將個波一路帶橫，Sterling輕輕掂左v.Dijk一下後，v.Dijk只顧投訴而忘記保護個波，比Sterling一推，Sterling手部確有動作，但球證認為唔足以犯規，就被Sterling長驅直進傳俾Jesus先入一球。

呢個入球亦都係利物浦惡夢既開始。

曼城一如所料瘋狂壓迫利物浦，後場基本只留Otamendi，Fernandinho算係半個中堅落黎幫手駁腳將個波運上去。利物浦三箭頭只係企係曼城三後衛前面無進行迫搶，任由曼城搓到去中場附近先俾壓力防守。

不過可以話完全阻止唔到曼城推進。

曼城一路控球在腳不斷係左路製造麻煩，Sane同D.Silva傳中無數次，Sterling亦多番係右路進攻。機會愈來愈多，攻勢愈來愈接近。利物浦上半場已經收左3面黃牌，曼城有14次攻門，控球率73比，代表防守曼城非常吃力。
特別係防中替工Wijnaldum，上半場真係影都唔見：無Henserson既現位幫波，又無Can既控球在腳，基本上真係唔多見佢用波，好難評價。

不過上半場尾段最值得爭議就係Sane球詐糊。當時Karius出黎打手鎚已經唔係last defender，所以Sane的確處於越位位置，但如我之前球例分析所講，處於越位位置本身並不犯規。（https://youtu.be/7Hwv3oJ1PhU）

問題在於傳波俾Sane既係Jesus定Milner，如果係Jesus傳既Sane一定越位，但如果Milner傳就一定無越位。而多次睇慢鏡都見到最後觸球係Milner，所以呢球詐糊理應係一個入球。

利物浦好彩走甩一個入球後，上半場亦都完結。呢一個誤判真係好重要，非常打擊曼城士氣，要知道1球同2球係下半場打法真係完全唔同，好難怪哥迪奧拿咁勞氣，仲要被罰出場。

最後下半場一開波，曼城已經無晒靈氣，可能上半場谷得太盡要回氣，無對利物浦進去迫搶，讓出控球權俾利物浦。讓下讓下真係出事，曼城突然唔記得自己只打1個中堅，嚴格黎講係Fernandinho唔記得左，突然中路走甩左Salah...出現咁多空位Salah同Mane緊係唔客氣。
入左呢球之後曼城要入4球先可以晉級，成隊曼城已經半放棄，最後Firmino入多球正式玩完，轉台睇巴塞

頂...早知睇羅馬好過啦