歐聯8強次回合 皇家馬德里對祖雲達斯 賽後短評

可惜，真係非常可惜
皇馬開始以鑽石型442迎戰祖記，由Bale代替Benzema打前鋒。同上回合一樣進攻buildup時兩閘壓上，Modric同Kroos回後兩邊攞波組織，有趣既係Casemiro會係呢個時候壓上前場去到攻中位置，當個波去到三閘時又會番去中圈附近防止反擊，好似避波踢咁。
防守時Bale會回後變成451，同樣亦好似上回合咁中場一字排開防守，避免祖記利用邊路，不過效果就唔係咁好，因為上半場Mandzukic兩個入球都係黎自傳中頂入。

而祖記Dybala停賽，轉打433，Mandzukic打左翼。祖記防守時中場壓得好上，直接係皇馬後場壓迫，第一個入球就成功迫甩之後，中場球員已經好快速壓到皇馬防線形成4打4，Khedira既傳中真係恰到好處，Carvajal係尾柱要1打2，Mandzukic輕鬆頂入。
不過中場壓得太上既缺點係後面空間太多。防線最多壓到上中場線，但祖記中場線壓到中對方三閘線，防線與中場之間空位自然較多，面對皇馬既技術型中場，真係好難完全斷絕其組織。
祖記用意好明顯就係不斷利用邊路製造攻勢，不斷傳中挑戰缺少Ramos既皇馬防線，多次傳中都好有威脅，最後37分鐘再由Mandzukic係尾柱頂入，同第一球一樣，Carvajal都係要1打2。

有一個地方唔明，點解上半場17分鐘就換走Sciglio換入Lichtsteiner？又唔似受傷...不過Lichtsteiner又真係俾佢交出助攻

到下半場施丹見形勢比人弱，一口氣換兩個人，亦都同上回合一樣，只不過今次半場就換...換入Asensio同Vázquez分別打左右中場，用意好明顯就係對抗番祖記既邊路進攻。
呢個調動亦非常奏效，祖記既傳中次數真係大大減少。相對皇馬亦對增加邊路進攻，兩隊左右中場同左右閘互相抗衡，造成下半場大部分時間都處於膠著狀態。

去到60分鐘，又係一次祖記既傳中球，Nabas竟然一抱入懷係甩手被Matuidi執到撞入...呢個時候祖記有好大優勢

祖記谷左咁耐，仲有成20分鐘回一回氣好正常，所以之後既時間都皇馬主導比賽。當時我以為係尾段祖記會再谷一段，始終加時對祖記真係無著數...點知祖記真係用盡晒氣力，見到球員都無意慾谷多一段，明顯想守埋等加時...而祖記其實仲有2個換人名額未用...
最後係尾段意念一鬆，阿群把刀就入左... Sandro係尾柱俾到機會C朗突破越位頂俾Vázquez，Benatia從後跳起用腳想踢個波，但慢鏡見到Benatia出腳前有用手輕推Vázquez，再踢唔中波，撞跌左Vázquez...講真黎到門前Vázquez面對空門，Sandro都係焗出腳搏一搏，可惜從後去解圍太高難度...

去到最後1分鐘被判十二碼真係難怪Buffon咁激動，對球證出手被紅都無得拗...

係一個遺憾，祖記同上回合一樣又係打左90分鐘好波，但結果不似預計...

可惜，真係非常可惜