馬天尼仙變陣成功克服弱點 世界盃八強 巴西對比利時 賽後短評

馬天尼仙變陣成功克服弱點
世界盃八強 巴西對比利時 賽後短評

係賽前分析講過比利時最大弱點係兩隻翼衛防守同中路保護力不足：DeBruyne打中場防守唔積極兼埋沒佢既進攻能力，Carrasco、Meunier過度進取令兩邊變放題。

馬天尼斯一如大家所料將DeBruyne放上一格，用Fellaini填補中場防守力；但有一變動真係估唔到，Carrasco換上Chadli，最正係比利時防守時Chadli會移入中場，Vertonghen充當左閘，變成433；進攻時Chadli移番去左翼衛，做番以往既343。

防守時433解決左左邊用翼衛防守問題，因為巴西右邊攻力無左邊咁強，而且將Chadli收入中間形成3名中場中，塞係防線前禁區頂位置，完全加強番過去幾場中場中防守問題，最最最重要係令Neymar同Coutinho既大絕Cut大位毫無用武之地。三中場總有一至兩個封死Neymar同Coutinho既右腳，上半場鮮有機會可以就順右腳射門或傳送，被迫傳番去左路。比利時明顯有研究過巴西左邊套路，有幾球Neymar cut大位後反方向傳都被睇通左。
比利時塞死中路開放兩邊俾巴西落底，因為比利時有信心對付傳中。只要守得住，比利時既反擊陣容直情係屈機。DeBruyne明顯處於進攻中場位置，Lukaku右邊，Hazard靠左，左中右三點都可以做反擊既起點。只要任何一點將解圍控到落黎，另外兩點就向前走，比利時入個球反擊Lukaku係中間控到落黎都未轉晒身時，DeBruyne已經係右邊加速跑緊，但Lukaku成功轉身DeBruyne已經殺過半場入緊三閘線，Macelo要1個打2個，難守也。

整個上半場巴西受制於比利時既變陣，毫無進攻板斧，要變只能半場入更衣室做調整。

首個變動換走Willian換入Firmino，Jesus拉去右邊。Willian有個問題就係突破力不足，而且佢慣性Stay係右邊又無突破，有幾次見佢拎住個波企係到等右閘Fagner由老遠跑過黎疊瓦式...等得黎比利時都準備好。Willian令巴西太依靠左路進攻，令比利時太易守。

其實分組賽對哥斯達黎加都有呢個問題，當時教練泰迪半場換Costa，右路即刻生晒。不過今場卻選擇換Firmino先，Firmino入左黎係多d變化，但呢個變動效果唔太明顯，對比利時防守威脅不大。

到58分鐘真係換Costa入黎就有番d入肉攻勢，Costa有能力1對1落底傳d cut back傳中威脅大好多，唔洗單靠左邊製造威脅。令比利時防守疲於奔命，到下半場中後段，比利時防守開始有d散。
而且唔知點解下半場比利時既反擊往往只欠最後一傳。第一反擊點攞得好好轉埋身加速，但無論DeBruyne定Hazard最後一傳唔係太細力就係傳番比巴西，搞到唔可以早早完結比賽。

馬天尼斯見整體發揮唔錯唔敢亂換人，但時間過去明顯見到比利時體能下降，防守開始唔集中。條中場線開始散，唔夠緊密發揮唔到保護作用。防線無左中場保護之下，再比巴西兩邊拉開，都開始出現漏洞。

Augusto入個球就係因為比利時中場速度慢左，俾Coutinho太多空間思考；Augusto係中場同防線之間無人理，就係源於之後賣老抽Chadli身後位置；Vertonghen再因為Costa關係位置偏左，就俾Augusto成功入攝。

馬天尼斯唯有換Vermaelen打番三中堅，total有成四個中堅...最後換埋Lukaku打532死守完場。

大家都估到馬天尼斯會變，但估唔到變得咁好，上半場巴西10射比利時8射。巴西上半場被完封下泰迪做左適當回應，下半場慢慢攞番主導權，下半場巴西17射而比利時得番1射。不過如果比利時下半場反擊做得好d，就可以早d完結呢場比賽。