//曼聯對阿仙奴 賽後報告//

對於阿仙奴球迷黎講，一分經已"十分收貨"。但對於教授調動同臨場戰術卻氣惱衝衝。

從教授排出正選陣容來估計，呢場大戰出艾蘭尼而唔選夏卡出任正選明顯地想用走動覆蓋率來對抗曼聯，但我對於用藍斯代替伊禾比有點保留，因為本身藍斯唔習慣踢邊路還要出任錯腳中場，所以好明顯從整場比賽來看，呢個排陣明顯有出錯既成份。


反觀對於"特別的一個"排出陣容有些小估計不到就是用卡域克出任正選同用達美安代替白蘭特。

頭15分鐘，雙方明顯地未能入局，不停係中場球來球往，兩隊都未有具質素既組織。但是值得一讚華舒福既表現十分出色，只不過係一個年輕球員可以有出色既走位同單對單過人既膽量，相信呢個小子應該有一條光明既大路。

上半場最具爭議性話題必定是蒙維爾係禁區拉跌華倫西亞呢一下動作，其實明顯地呢一球係可以吹罰12碼，因為明顯華倫西歷完美咁呃過咗佢，還要從後拉跌咗華倫西亞，球證沒有任何表示，只能說阿仙奴十分好彩。
仲有一球就係曼聯一個漂亮組織最後馬達射到一腳唔錯既射門，可惜施治封位十分出色，令到曼聯上半場未能零先一球返入更衣室。

講返上半場，雙方其實實質無任何太多具威脅政門，主要係雙方都主要先做好防守工作先。可以見到阿仙奴係近年既強強對壘當中，教授都通常放棄傳統既控球打法而轉為防守反擊，所以睇到呢場波整場賽事都好小見到前場漂亮組織同前場入楔既情況發生。但係阿仙奴既反擊明顯地無曼聯咁到肉，所以曼聯整場壓住阿仙奴黎踢。

下半場可以算係阿仙奴今季暫時為止最差既表現。首先想講未失波之前表現，阿仙奴完全縮到條中場線太後令到曼聯經常可以係後半場輕鬆組織，雖然主打防守係可以企位企到咁落既位置，但是阿仙奴球員明顯有點不知所措，兩閘既盲眼位好容易俾曼聯球員入楔到。而曼聯所入既一球一定要讚靴里拉既出色走位同十分帶默契既傳球傳送到馬達，充分見到西班牙球員既足球智慧係十分之高。但係呢球蒙維爾應該要付上全部既責任，因為普巴根本只有一條線路可以傳送到，若果蒙維爾快小小洞悉到呢下既路線，靴里拉未必可以咁輕鬆傳到出黎俾馬達。


另外想講就係教授調動時間配合，我個人認為呢三個換人調動係十分出色，不再係位置上調動，而是把整個陣容轉換成雙戰頭同想用夏卡控制返個中場同增強創造性，而張伯倫打右閘亦係一個進取既調動，但其實係咪可以更早階段作出呢三個調動呢？係一個值得相討既地方。


張伯倫同基奧特，兩位球員拯救返阿仙奴，其實個人認為呢場波出張伯倫係好過禾確特，因為單對單過人明顯好過師兄，還有禾確特係一個好需要空位入楔既球員，但係曼聯防線比較企位方面企得比較深，所以一定要用個人突破去衝擊對手。


山齊士一定係呢場踢得最差既球員，並不是有機會有傷在身，已是當球隊落後時佢不停吊一些高波入去而令到我覺得失望，因為對手已經完全十分多人係禁區準備解圍，而點解唔嘗試作出比較簡單小小既傳球先呢？呢一方面係我認為山齊士係落後時需要改善既地方。


最後阿仙奴呢場最佳球員一定高基連，佢整場比賽十分出色攔截幫助了一對中堅，我相信而家阿仙奴係大戰當中不能夠沒有佢存在，因為只有佢有能力作出出色鏟球。