【港隊對日本】輸六球，上一課。

（圖：香港足球總會）
今日舉行嘅東亞足球錦標賽，香港隊作客面對亞洲強豪鎩羽而歸，輸咗六球，可能有好多人覺得港隊又出去獻醜，而比賽結果亦的確反映優勝劣敗，而水平的而且確係有差距。有別於我以往嘅文章，我今日想同大家講一個故事先。

話說小弟以前都係一個運動員，雖然未到頂尖果批，但都叫做係U-Team成員，亦都喺唔少業餘嘅比賽拎過獎，亦都自問有住唔差嘅競爭力。有一次，我有幸同香港冠軍打場波，當時嘅我自問都好Fit，亦都用自己對呢個球類咁多年嚟嘅理解迎戰，但落到場，所有我認為做足嘅，佢都會比我預備得更多，我計算好嘅嘢，佢都會用我意想不到嘅巧妙技巧去令我防不勝防，我腦海入面，根本就對佢嘅錯綜複雜嘅球路毫無認識，亦都難以防備。

簡單啲嚟講，我諗到嘅野佢諗到，我諗唔到嘅野，佢都諗到。所以即使我已經做到自己嘅最好，最後嘅結果都係慘不忍睹。
果刻，我先知道，原來波可以咁打。

但之後，呢位香港嘅業餘球員有機會出戰公開賽，對陣韓國國家隊嘅成員，仍然被人打到落花流水。事後我再問返佢有咩感覺，佢都係話「對方做嘅野，已經喺我想像之外。」

而今日嘅日本球員踢出嚟嘅足球，亦都喺港隊球員嘅想像之外，特別係防守球員。

正如頭先所講，慘吞六球絕對唔係啲咩好成績，但對於港隊嚟講，我相信好多球員已經踢出比喺港超聯任何一場都好嘅表現。今日港隊防線呈現出嚟嘅隊型其實係嚴謹嘅，係對方慢慢打到上嚟嘅一刻﹝唔計反擊﹞，球員嘅企位係清晰嘅，但當對手進行好多三閘線，禁區頂之間嘅快速拉扯嘅時候，有種感覺係香港球員根本就唔能夠預計佢哋會咁做。因為平時對果班對手，根本就做唔到呢件事，面對未見過嘅野會猶疑，溝通上會出現錯誤，咪就令到Man Marking 有空位，比人攝到入去。

同理，係邊路對波方面，可能次一級嘅球員接到直線，要修正一腳先出到波，所以後防球員覺得可以用N秒埋去拍，但事實係，高一班波嘅，已經係接到波之後修正埋，就出到好靚嘅傳中球，用嘅時間，就係N-1秒，就係呢一秒就足以比對手出到個波，做成威脅。亦都可以見到有好幾球，以港超嚟講叫封晒位，但對於日本球員嚟講，仍然有足夠嘅空間攻門。
呢啲，就係因為平時對手嘅唔同，所做成對「足球」喺認知上嘅差異。

總括而言，香港嘅足球水平，同世界主流尚有一大段距離，但就正正因為咁，香港嘅球員更加要Stay Hungry，去認識足球嘅世界有幾大。有好多時，可能你已經覺得自己做到100分，但原來要300分先合格。而球迷們見到港隊慘被大數，亦必須承認雙方喺實力上嘅差距，但落井下石又在所不必，唔係話要比啲掌聲自己，但我相信既然佢哋已經交出咗佢哋最好嘅功課，而唔係做得比自己能力差嘅時候，亦未必需要苛責。

最緊要嘅係，知道自己犯咗咩錯，知道自己嘅弱點，再去尋求進步，真正嘅向世界出發。