攻不銳，守得穩，稍不慎，跌三分 – 香港對中國 賽後評

前言
喺七月二十八日下午舉行嘅東亞足球錦標賽，中國隊憑住譚龍把握港隊解圍出錯，射入全場唯一入球，令港隊算叫做主導形勢嘅情況下，以零比一飲恨。好多人都為此而大呼可惜，但始終主導形勢同贏波係兩件事嚟，咁中間差啲咩呢？
喺今場比賽入面，安達臣繼續沿用逼搶戰術，令中國隊難以從後場組織攻勢，只能靠反擊同死球製造威脅，喺上半場初段，我哋見到港隊喺防守死球方面嘅企位比較鬆散，令對方有好多Free Header嘅機會，當中就有一球只係靠護空門而大難不死，但港隊入局後，相關嘅情況已經減少咗好多，亦都見到兩個中堅之間慢慢開始有默契，喺運動戰入面表現出足夠嘅硬朗同集中力，對方亦難以用生波攻陷港隊城池。而我哋亦都見到香港隊喺中場猜傳方面明顯下過功夫，縱使偶有甩拖，但中場咁高嘅運轉效率，實屬近年少見。可惜當中後場都做得好，可以將個波運上前場嘅時候，前線嘅球員就滾水淥腳咁，腳頭無靈，種下咗苦果嘅種子。

以下我將會逐一點評下各個有份出場嘅球員，合格嘅分數係5分，我嘅評論唔代表一切，亦都唔一定啱晒，你可以話我唔識波，但希望大家都可以提出返相關嘅例子同論據，營造一個以事論事嘅討論環境。
門將：陳嘉豪 7/10

對比起上場左飛右撲，繼續正選嘅嘉豪相信今日應該輕鬆唔少。今日嘉豪喺中國隊攻勢較少嘅情況下仍然能夠保持集中，面對一啲斜直線同傳中球嘅進襲，嘉豪嘅出迎同出手判斷仍然相當果斷，應出嘅出，應接嘅接，亦都突顯出嘉豪有住做門將需要嘅信心。

話雖如此，今場嘅嘉豪又係咪無不足呢？港隊失果一球，我認為無撲救上嘅責任，但無論喺解圍嘅失誤好，上半場喺防守死球嘅編排都好，門將作為防線嘅一員，亦係眼看四方嘅一個，我認為佢同防線嘅溝通可以再做好啲，要好似阿輝咁壓得住場，先可以做到統率防線嘅角色。

總括而言，今次嘉豪表現出好唔錯嘅潛質，希望佢喺港隊同理文都可以得到更多機會，好好咁磨練，挑戰更高嘅舞台。

左閘：梁冠聰 7.5/10

今場嘅大佬踢得相當有火，全場助攻助守，攻嘅，傳中質量相當上乘急勁，守嘅，落腳準繩，亦有一次關鍵嘅護空門，全場嘅表演好投入同集中，呢樣係必須要讚嘅。
大佬嘅弱點始終在於速度，而中國隊亦都睇穿咗呢樣野，多次向邊路進襲。講真，如果中國隊球員同大佬平排起跑，去到角球旗大佬應該會輸一兩個身位，但速度贏唔到你，就贏路數，多次準繩嘅攔截，足以將來襲擊退。

係咪又係踢到曉飛咁呢？人無完人，失球之前嘅連串解圍失誤，大佬絕對有責任，而有幾腳攔截亦有過勇之嫌。但左計右計，我都認為大佬喺場上嘅表現同熱情，都令佢成為場上最閃亮嘅一個。大佬嘅港隊路，一路係且行車珍惜，但呢份熱情，絕對係港隊需要嘅。

右閘 茹子楠 6/10

本身係中場出身嘅茹子喺呢次比賽轉型做閘位球員，相對地防守意識同企位方面有所不足，但係就以球員嘅體力同拼博搭救。全場嚟講茹子喺防守方面無乜太大甩漏，仲有一下壓上去嘅臥射斜出，今仗嘅表現相當稱職。但值得擔心嘅係茹子喺比賽尾段不時有體力不繼嘅情況出現，體力流放嘅管理需要再加強。

中堅 勞烈斯 6.5/10
除咗一開波喺防守死球方面做得比較差之外，勞烈斯嘅表現絕對係一場比一場進步，同謝家強一個搶，一個包嘅默契亦都越嚟越好。今場面對中超嘅一班同級對手，速率固然不落下風，閱讀球賽同判斷就更勝一籌，亦都少咗好多之前標波嘅失誤。進攻方面，勞烈斯亦都係港隊喺死球方面嘅Target Man，有一下衝頂亦相當有威脅。
可能喺中超上陣嘅時間唔夠，令到頭兩場嘅表現唔太入局，希望佢喺球會能夠攞到更多機會，保持狀態同繼續進步。

中堅 謝家強 5.5/10

頭先講到好多時港隊中堅都係一個搶一個包，咁勞烈斯清到波，謝家強就真係無咩做。作為隊長嘅謝家強今場嘅存在感其實唔高，攻守方面都唔多表演嘅機會，表現不過不失，而作為球隊嘅隊長，謝家強亦未見有阿輝果種「嗌住隊波」嘅氣勢，呢方面亦可以多多向前輩學習。

防守中場 胡晉銘，陳俊樂 7/10

對比起對日本打單防中時嘅掙扎（當時樂仔啱啱歸隊，唔即刻擺佢出嚟都合理。），香港隊喺防中呢方面有明顯進步，胡晉銘同樂仔兩個人喺呢場遮線做得相當妥當，更加勇於逼搶，令中國隊唔少攻勢喺中場線就斷欖。透過逼搶獲得嘅控球權，亦都好快就可以透過中場搓傳，搵到空位之後將個波交去邊路或者前場，有唔少交波相當獨到，亦都敢於更加引球出擊，成為港隊反擊嘅第一點。

防守中場其中三個責任 - 做屏障，控制節奏同埋反守為攻，呢三樣嘢由兩個防守中場分擔，效果相當唔錯，絕對值得鼓勵。
進攻中場 黃威 4.5/10

今場我俾黃威嘅評語只有四個字，操之過急。

相比起上兩場，中國隊喺中場防守嘅強度絕對較低，黃威應該有更加多發揮嘅機會，但當樂仔同晉銘成功將個波運上前場，作為進攻核心嘅黃威就每每死去，動輒浪射，踢到滾水淥腳咁樣。而即使唔射，佢交出嘅致命傳送亦少之又少。如果面對中國B 隊都感到吃力，我亦都恐怕面對實力更次，更加死守嘅球隊，港隊都係冇破門嘅機會。

右翼 羅梓駿 6/10

經過咗亞冠同埋亞洲杯外圍賽嘅洗禮，唔少人都覺得羅梓嘅成長相當明顯，喺安達臣嘅逼搶戰術底下，有踢過閘位嘅羅梓喺扮演第一度屏障方面做得相當稱職，但有時都會收唔到「包抄」嘅效果，亦都識得喺對方打反擊嘅時候作出一啲職業犯規（雖然可以做得再聰明啲），但係進攻方面，今場見到港隊其實有唔少嘅交叉走位，羅梓亦都勤力走入中間，企圖拉散對方後防。但好多時羅梓走到空位，又好似無隊友比到佢咁，唔知係賽前嘅briefing 要多啲遠射定點啦，但羅梓同前線其餘拍擋嘅溝通就要好好培養一下啦。
左翼 孫銘謙 4.5/10

解圍失誤導致失波嘅人就係佢，對佢嘅表現扣分亦都相當合理。今場波港隊左路嘅攻勢其實相當多，但打到落去好多時都係安永佳，樂仔，或者大佬走上嚟做前插多，孫銘嘅參與反而係多次交叉走位進入禁區，但無論係人少打人少，定係喺中場慢慢打入去嘅入滲，一嚟好多波係禁區外已經射咗，但其實佢有好多球都走唔到一個好好嘅空位，令自己成為中場同埋閘位球員嘅選擇。無乜波到佢腳，就自然無咩發揮空間。同時，喺防守方面，明白佢喺過往比較著重進攻方面，但今場係防備對方嘅攻勢方面其實相當狼狽，失波果球不在話下，另外亦都有好幾球喺大佬Overload 嘅時候返唔切嚟補位，亦都有部份係跟唔到，埋身唔夠決斷嘅情況出現。

喺安達臣帶領嘅港隊，進攻球員要肩負嘅防守責任其實多咗，呢方面佢需要適應。而孫銘嘅踢法究竟係入攝型前鋒，定係真係打翼，相信都係安達臣需要考慮嘅問題。

中鋒 安永佳 5/10

佳佳今場嘅表現其實相當努力，起馬見到佢喺對方後防線多次遮線，呢啲跑動絕對幫到球隊Buy Time 重組隊型，但中鋒要做嘅破門，佳佳真係做得比較差。
我曾經都講過，牙佳需要改善嘅地方起馬有3個 - 1. 點樣運用佢嘅身型 2. 前場控球嘅視野同決定速度 3. 埋門質素，呢三個缺點喺今場表露無遺。今場面對中國國內聯賽球員，我相信以技術計未必好細膩，但佢哋嘅體能同力量就絕對唔差，但牙佳話晒都有188嘅身高，加上經歷過亞冠嘅歷煉，對住中國隊嘅球員理應佔到甜頭，但事實上就事與願遺。無論喺禁區上嘅爭頂，定係接應直線時邊跑邊做嘅身體對抗，佳佳都會輸比對手。有時練咗有力量，都要知道究竟要點樣用。如果對住中國呢啲稍為硬淨啲嘅都已經無肉食，對住再硬啲嘅西亞球隊就更加隱形。

而如果牙佳拎到波，第2 第3 個缺點亦會即刻浮上面，無論係上場定今場，牙佳拎到個波之後比人嘅感覺都係好猶疑，甚至有啲望地下嘅感覺，好多時要拖一腳兩腳，先至會交到邊比隊友。甚至乎喺仲諗緊點做嘅時侯就已經失咗個波。呢個問題除左歸咎經驗之外，亦都同場上嘅習慣有關。丹恩之所以神，其中一個原因就係佢用佢嘅經驗睇通咗一條進攻路線，控到波就實行，而唔係個波嚟到先諗。希望牙佳可以繼續向丹恩多多學習啦。

後備

簡嘉亨 - 4/10
講明先，我覺得係要比佢試嘅，但試完，又真係反映佢唔夠班。

講咗優點先，簡嘉亨有火嘅，會逼嘅，係抵讚啊，但有時真係心有餘而力不足。佢喺閱讀球賽嘅能力真係仲未達到港隊嘅層級，今場換到出嚟，基本上成為左路進攻終結者，每每一拎到波就盲頭烏蠅咁亂咁衝，甚至乎係有啲唔知自己需要係戰術上面要做啲咩。回防積極，但又方寸大亂。Khan 嘅速度同拼勁絕對有價值，21歲嘅佢臨場甩碌亦唔係話不可原諒，每個人都有佢嘅Learning Curve，揠苗助長只會做成苦果，只希望佢可以喺重開嘅港超賽場上好好鍛練，他日帶比球迷驚喜。

鞠盈智 - 5/10

今場表現唔算太好，跑動算多，但傳球嘅路數唔喺應有水平。

鄭兆均 - NA/10

換咗落嚟之後唔知做咩打死簡嘉亨果邊，無咩機會掂波，相當可惜。

總結：

失望就梗架啦，但安達臣帶領幾場下，港隊嘅雛型已經出咗嚟，但迎面而嚟嘅課題仲會有更多，希望安蛇可以喺之後嘅日子Keep 住呢個進度，執整下啲細節，令港隊嘅表現繼續進步，喺亞洲盃挑戰其他亞洲強豪啦。