差了一腳？差了半場？ 香港對緬甸賽後評

圖片來源：HKFA

香港隊喺琴晚﹝24日﹞喺超過一萬二千名主場球迷支持之下，未能承接幾日前喺旺角場以二比零擊敗對手嘅氣勢，僅能以與緬甸以零比零嘅比數握手言和。上半場香港隊可以話係撳住嚟打，運用高速嘅壓逼，多次喺對手半場成功搶到控球權，更令緬甸隊鮮有喺港隊半場控球組織嘅機會。港隊更有多次禁區內嘅攻門機會，可惜未能把握，錯失半場領先嘅良機，到下半場一出嚟，更見到部份球員喺信心同體力方面嘅下降，逼搶嘅速率亦都慢咗落嚟，持球進攻時有多次無謂失誤，旋即被對方打反擊，而喺防守佈陣同分工方面亦未見清晰，多次有走甩嘅情況。好彩緬甸隊球員嘅個人技術唔高，如果唔係絕對有機會失波。
琴晚見到有唔少嘅評論都指出港隊只能摸和，其實只係差最後一腳，係把握力嘅問題。的確，如果港隊可以喺上半場領先，呢場波會易踢好多。而入唔到波絕對係把握力出現問題。但點解喺下半場又未能夠執行返喺對方半場逼搶嘅戰術，甚至多次被對方攻入心臟地帶？今次呢篇文，就係想針對住港隊下半場出現嘅問題提出少少見解。

上半場點解咁佔優？

上半場港隊嘅逼搶戰術做得相當徹底，基本上大半球員都企喺對方半場，喺人數同身體質素都有優勢嘅時候，即使對方喺防守時搶返控球權，都因為前場逼滿人，而難以做出有效嘅組織，交出嚟嘅波亦都多數喺逼搶底下失咗，港隊藉此重奪控球權。而有時緬甸隊甚至連波都交唔到，只能夠向前場解圍。就係咁，安達臣嘅逼搶策略，就令緬甸隊陷入「防守 – 失控球 – 防守」嘅惡性循環之中。
客軍下半場嘅改變

下半場一出嚟，港隊見上半場攻得咁入肉，就當然希望繼續將成隊波壓前，盡快爭取到入球。但緬甸隊喺半場嘅Team Talk 之後，打法有明顯嘅轉變，再唔執著於防守成功後盡快向前打反擊，而係喺重奪控球權之後盡快拉開兩邊嘅闊度，兩三腳傳送之後將波分去比兩邊嘅側擊球員做突破。而咁啱今仗安達臣嘅戰術，好多時都係要利用左閘位送一啲長波入禁區製造混亂，令左閘嘅企位較前，而梁冠聰嘅速度其實相當一般，好多時都未必追到對方嘅邊路球員，令緬甸隊有好幾次攻勢都可以突破到港隊嘅三閘線，而當敵隊攻到港隊嘅三閘線時，本身壓上嘅一對中場亦都需要返去禁區頂幫手，對手多次嘅高速衝刺令本身要喺對方半場斬波嘅呀聰，同埋喺對方半場做逼搶嘅黃洋，鞠盈智需要多次來回回防，而同時，進攻中場Philip 喺無正式比賽嘅情況底下，體能亦不及之前，呢幾位球員嘅體力急劇咁消耗，更令本身行之有效嘅戰術土崩瓦解。

中場活力之於「安氏」香港

前文提到，逼搶嘅成功，在於人數上同身位上嘅優勢，就算一個球員做逼搶「拍」唔甩個波，都會有另一位中場球員幫手去爭一啲Loose Ball，令港隊唔怕「同對方拍」。但喺中場體力慢慢咁減低嘅時候，逼搶時支援速度亦都會降低，令緬甸球員由本來要面對兩至三個港隊球員，變成只係一對一，令佢地頓時鬆綁，執行到更多進攻嘅指令。
逼搶嘅中心在於中場嘅支援，喺黃威缺陣，顏樂楓缺態嘅情況下，安帥亦只能選用黃洋，鞠盈智兩位老將，但選用老將喺一周雙賽嘅情況下打逼搶，體力不繼嘅結果就喺呢度表露無遺。及後安帥換入鄭展龍同胡晉銘兩位中場，希望提升返中場活力，但呢兩位中場從來都唔係以拼博同跑同見稱，令到換入嚟之後表現都只係平平無奇。

總結

同球迷睽違已久嘅港隊未能喺重逢時獲勝，的確令人宛惜，但眼前嘅呢隊香港隊，有好多其實都未必係年終亞洲盃嘅人選﹝例如踢緊中超嘅茹子楠、梁諾恒、勞烈斯、陳俊樂、安永佳，外流西班牙嘅陳晉一，今次未能出戰嘅黃威﹞，半力出戰嘅港隊亦都喺上半場成功執行戰術，側面咁證明其實呢一大班球員都係融入到安達臣嘅戰術理念。距離亞洲盃仲有一段時間，希望安達臣可以再執整吓呢隊香港隊，喺大賽再為香港人帶來驚喜！