逼搶是為了甚麼？ - 香港對越南賽後速評
港隊為備戰亞洲盃決賽周，喺今日﹝2023年6月15日﹞作客海防，同世界排名95嘅越南隊拍跳﹝香港隊世界排名為147﹞，最終越南對憑桂玉海﹝Quế Ngọc Hải﹞ 十二碼中鵠，以一比零小勝港隊。呢篇文將會先簡評香港隊嘅整體表現，然後再個別評論三線同個別球員嘅表現。
整體發揮1：形似神不似嘅逼搶戰術？
挪威籍教練安達臣已經執掌港隊好一段時間，相信港隊陣中嘅大部份球員都對佢主張嘅逼搶踢法有一定嘅認識。而今日嘅比賽，亦都見到唔少球員係有落力逼搶，但多數時間仍然被越南隊壓住半場嚟踢。
咁究竟發生了甚麼事？我只係想提出一個問題 - 就係逼搶究竟係要導致啲咩發生。
逼搶係一種手段，唔係一種結果。縱觀各大聯賽嘅頂尖球隊，採取逼搶呢種手段，為嘅就係壓縮對手嘅控球時間同空間，透過逼搶，可以令
1.對方球員嘅傳球選擇減少，令對方球員需要盤球尋找空間，同需要與我方嘅球員纏鬥
2.壓縮對方球員對來球嘅準備時間，降低佢哋First Touch或者傳球嘅質素，從而令對方唔可以傳到腳，增加搶截嘅成功率。
但今場比賽比我嘅感覺，就係港隊嘅逼搶未能轉化成為以上兩種結果。
喺越南球員控球果陣，港隊球員埋去拍，係正確嘅做法，亦都做到初步嘅戰術要求。但要點樣拍，先可以做到「重奪控球權」呢件事？
首先，我觀察到港隊球員埋去拍嘅時候，越南球員已經完成咗佢哋嘅First touch，思考緊點樣保護個波再做輸送，所以港隊球員拍埋去果陣，其實越南球員已經準備好，變相令港隊球員逼搶嘅威脅大減。
其次，港隊球員逼搶嘅其中一個任務，就係減少對方嘅傳球選擇，但好多時逼搶都遮唔到越南球員嘅傳球路線，即使越南球員需要同港隊球員做身體對抗，但由於無遮到傳球路線，令佢地亦未至於太難組織攻勢。
其三，逼搶係一種團隊戰術，前鋒出去逼，其他中場就要貼緊對方嘅球員，先可以喺對方球員因為被逼搶而喺傳球時犯錯果陣奪回控球權。但喺呢場比賽入面，當港隊第一個球員去逼越南球員嘅時候，即使令越南球員嘅傳球質素降低，但其他港隊球員因為無跟晒，而未能把握對方犯錯奪回控球權，而正正因為無預先逼，導致對方球員拎到波果陣，已經完成咗First Touch，然後去返第一點，無限輪迴。
最後我想帶出一點，我雖然好似踩到香港隊嘅逼搶一文不值，但事實上，越南球員喺今場波入面，亦都真係因為港隊嘅逼搶而做成唔少犯錯，所以港隊球員嘅努力係有回報嘅。但就係因為以上幾點，令逼搶嘅回報比預期中少。
整體發揮 2 ：逼搶了，然後呢？
正如頭先咁講，越南隊係有唔少嘅犯錯，令港隊球員可以重奪到控球權。
但，然後呢？
今場比賽入面，有好幾次香港隊球員喺中場重奪控球權之後，未能好好咁作出傳球選擇同埋保護好個波。令港隊球員轉守為攻，開始走位之際，已經將控球權草草拱手相讓，球員又要去返逼搶，變相球員要無限來回跑，消耗大量體力。
咁點解會咁呢？
首先，兩位防守中場嘅狀態真係相當差。由其係陳俊樂﹝樂仔﹞，當日喺港超算係基本功數一數二，到今日喺廣州隊傷完返嚟香港，First Touch 同傳球路線都完全失控，反映樂仔其實未操起。以樂仔全盛時期嘅能力，佢絕對會係港隊征戰亞洲盃嘅重要棋子，但如果呢排嘅操練仍未能夠操返起，相信安達臣都要考慮吓喺未來對泰國嘅友誼賽試用其他中場。
其次，喺中場球員成功搶到波之後，港隊嘅進攻球員好多時都會向前跑，但係直播畫面入面見到，港隊進攻球員向前跑嘅路線，其實都好難支援中場球員。令中場球員一係作出一啲太過大膽嘅傳球選擇，一係就需要自行帶返生個波，引嚟越南球員嘅逼搶。以上兩種，其實都係令越南球員重奪控球權嘅契機。如果喺逼搶成功之後，有一至兩位球員落嚟支援駁腳，令中場球員用波嘅空間變多，相信逼搶嘅效果會好好多。
整體表現就講完啦，而家我會講下港隊三線同個別球員嘅表現。
防線：5.5/10 ﹝謝家榮 8/10﹞
呢場比賽雖然僅以一個具爭議性嘅十二碼致敗，但其實港隊防線嘅表現亦只係僅僅合格，如果唔係越南隊嘅把握力唔高，加上謝家榮相當集中，作出唔少神救，相信港隊會再多失。
越南隊身型唔高大，打法強調走位同機動性，亦都係港隊一種轉身較慢嘅後衛最憎嘅打法。喺呢場比賽入面見到，梁諾恆同艾里奧兩位高大中堅，喺應對一啲禁區頂嘅猜傳果陣係跟唔上嘅，但兩位中堅勝在拼博，仍然能夠喺最後一刻閂走越南球員嘅射門。呢點係值得讚嘅。
兩側方面，黃梓浩同徐宏傑速率一般，令佢哋踢得有啲進退失據，逼搶不成，就更加令港隊邊路有更多空位比越南隊進襲，令中堅要應對更多嘅傳中波同邊路突入。
而對方喺兩側出波嘅時候，亦都未能跟上對方嘅走位入攝，令身體條件較好嘅港隊後防仍然會頂輸，特別係艾里奧。始終艾里奧年輕果陣都唔係快，而家更加年屆37，就更加快唔起嚟，面對呢種對手，真會一籌莫展，唯有希望今日有傷在身嘅勞烈斯能夠盡快復出，為後防線增添更多活力。
整體而言，如果對方唔係打快速反擊，港隊後防喺打陣地戰嘅時候，仍然能夠勉強阻止對方進襲，但對方一打得快，有4打4，5打5嘅情況出現，港隊球迷又要拎定個平安鐘出嚟撳。所以今場只能夠比一個勉強合格嘅分數。
中場：5.5/10 ﹝陳俊樂 5/10﹞
喺中場方面，老大哥黃洋，進攻中場黃威，同未操起嘅陳俊樂三個嘅活力完全喺越南中場底下。好多時速率不足，令越南球員可以轉身推進，或者以直線打身後波，中場瞬間就比人打穿，令三閘線承受更多嘅壓力。隨住比賽推演，中場球員嘅速率係有提升嘅，但當逼搶成功之後，亦做唔到好多具威脅嘅串連﹝有嘅，但成功率唔高﹞，更多嘅係草草交失，又或者未能保護個波，白白浪費體力進行第二次嘅逼搶。而去到75分鐘之後，亦都見到中場嘅體力下降得好快，對方亦有更多空位進攻，情況就變得更差。
而當後場開長波，成功比到前場球員嘅時侯，中場球員嘅跟進亦偏慢，導致港隊前場球員需要先面對兩至三個後衛夾擊，因而丟失控球權，或者錯過反擊嘅時機。
以上種種，其實都同球員狀態有關，希望港隊嘅球員可以喺操練入面盡快重拾體能同狀態啦。
前線 6.5/10
我相信唔少球迷都對香港隊未能夠入波而覺得可惜。的確，香港隊係有至少兩至三次嘅黃金機會，但無論係安永佳定孫銘都未能把握。有啲人可能覺得港隊鋒線敗家，但我就認為其實港隊鋒線已經有所進步。
首先，今日港隊嘅黃金機會，其實都唔係「餵到埋口食唔到」果種，而係需要自己突破入禁區。或者係我嘅Expectation太低，但今場波港隊前鋒起馬做到「控落嚟 -> 帶順 -> 起腳」呢幾個突擊必需嘅步驟，總算比控甩波，推離身好。
其次，今日港隊前鋒喺被對方球員緊逼底下，仍然有好幾次做到保護皮球並嘗試突破。當中孫銘謙以一敵二成功突破然後博到罰球令人印象深刻。但既然前鋒拎到個波落嚟，咁中場就需要跟上去延續控球同組織攻勢啦。
當然，港隊嘅前線都唔係無弱點嘅。正如教練安達臣所講，港隊最缺嘅，係一個有把握力嘅前鋒。而已被港隊徵召，但因為證件問題未能上陣嘅米高，會唔會係解決呢個問題嘅良方呢？此外，安永佳喺中甲一直係禁區之狐嘅角色，要佢上腳突破，又做唔做到呢？我哋拭目以待。
總括而言，面對世界排名較高嘅越南，咁樣輸法係好唔抵，但係我亦都覺得港隊叫打出戰術雛型，但實行起上嚟仍有唔少沙石，亦有唔少球員狀態上需要提升，整體嚟講算係合格，希望主帥安達臣能夠從呢場波入面得到啟發，並且率領港隊喺嚟緊對泰國嘅比賽交出更好嘅表現啦。
今場比賽港隊MVP : 謝家榮