瘋狂世界盃補習社（一） 墨西哥三度「捧盃」

2018俄羅斯世界盃踢到1/4都無，由揭幕戰開始幾乎場場觀賞，體力已開始不繼。無計，由1986年世界盃正式加入「世盃睇波團」至今，大大話話都有32年「波齡」。不過，講今屆的睇波時間其實好就得人 (當然是香港人啦)，因為賽事在俄羅斯踢，計算時差方面，在港播放球賽的時間集中晚上8時、11時，最晏都係凌晨2時，完全受惠於一班無論風吹雨打都要被誠哥召命的可憐打工仔。
不過，講最難捱的世界盃開波時間，點計都無得比喺美洲舉行的嗰幾屆艱辛。言猶在耳，又諗返起4年前巴西世界盃差唔多場場淘汰賽睇完都「天濛光」，真正由入黑睇到天光。無獨有偶，早前國際足協宣佈，2026年世界盃主辦國將由美國、加拿大及墨西哥三國主辦。傳統弱隊加拿大到時喺分組賽出唔出到線都成疑問。無所謂啦，反正一早有南非「墊屍底」。
        不過，我反而想講墨西哥呢個中美洲國家。它，既不是傳統足球勁旅；亦沒有捧過世界盃的輝煌歷史，但三度成為東道主已成迄今舉辦世界盃最多次數的國家。受惠於主場之利，國家隊在世界盃最巴閉嗰兩次就係1970年及1986年在該國舉行嗰兩屆，都係入8強。講開1986年那屆，其實原先主辦國並非在墨西哥舉行，而是南美國家哥倫比亞，可是國家「長期糧尾」，在嚴重財困下唯有放棄主辦。國際足協有見及此，立即將賽事改由墨西哥舉行，皆因墨國有舉行世盃的前科，大部份球場亦乎合國際標準，可謂「冷手執個熱剪堆」。2026年第三次舉辦世界盃，會否更進一步呢？8年後的今日，墨西哥會話你知。

 

你可能還對以下內容感興趣
瘋狂世界盃補習社（二） 入6球穩膽做神射手？
低水平但高注目 名嘴球場單挑參議員
今屆世盃廣告精選 乜嘢風格都有 梗有條啱你
連續兩場日落即傷？ 突尼西亞奇招避齋戒


資料來源：men's uno (http://hk.mensuno.asia/node/%E7%98%8B%E7%8B%82%E4%B8%96%E7%95%8C%E7%9B%83%E8%A3%9C%E7%BF%92%E7%A4%BE%EF%BC%88%E4%B8%80%EF%BC%89-9861)
本文由《men's uno》授權報導，未經同意禁止轉載。