瘋狂世界盃補習社（六），荷蘭先係絕種二奶命

有人話，今屆世界盃無咗意大利、荷蘭等傳統勁旅，失色不少。其實，呢個世界好公道嘅，有實力咪入圍囉，無實力嘅就算俾你勉強晉身決賽周，又如何呢？如果好似打網球咁大會有外卡參賽資格權利，咁不用打外圍賽啦，「贏國」肯定第一個可以豁免打外圍賽自動晉身世界盃決賽周。
 不過，無咗意大利和荷蘭喺世界盃大舞台出再現，係的確有點遺憾，也只能說他們唔爭氣吧。意大利這支國家隊即使過去偶有低潮，都有能力自癒並在不日重燃火光，所以我並不擔心意軍重光之日，相反荷蘭這支「橙色軍團」就真係天生二奶命也。不講不知，荷蘭過去曾3次晉身世界盃決賽，卻又未竟全功地全部悉數敗陣，認真可悲。在1974年，荷蘭由告魯夫帶領下，以「十上十落」的全能足球震驚球壇，不失一球殺入決賽對主辦國西德，開波唔夠3分鐘已經憑12碼領先，諗住「實食無黐牙」，卻還是不夠西德的主場之利硬淨，最終輸咗！

唔緊要，4年後再嚟過，遠征布宜諾斯艾利斯仲要喺告魯夫唔隨團之下又俾佢哋殺入決賽，點知對手又係主辦國阿根廷，在先失一球下完場前追和逼到對手打加時，諗住「好嘢！啲運未走！」點知打到加時都係輸，連續兩屆屈居亞軍後，1982年及86年兩屆連決賽周都入唔到。

儘管1988年打起當年的荷蘭三劍俠雲巴士頓、古烈治及列卡特，但只能在歐洲國家盃大放異彩卻未能一登世盃寶座。8年前，眼見飛雲又來了，機會難逢下再度晉身決賽，以為事不過三，老天爺唔會咁大整蠱啩，誰知又係輸加時，今次仲要俾西班牙趕上首奪世界盃。嗚呼哀哉，如此運滯，荷蘭仲唔係真真正正嘅Holland Orange (荷蘭橙)？


 

你可能還對以下內容感興趣
NBA終於選完秀 三大輸家係邊位？
早到機場唔想齋等？ Plank到上機有冇得諗
瘋狂世界盃補習社（四） 睇世界盃，學世界歷史
瘋狂世界盃補習社（二） 入6球穩膽做神射手？

資料來源：men's uno (http://hk.mensuno.asia/node/%E7%98%8B%E7%8B%82%E4%B8%96%E7%95%8C%E7%9B%83%E8%A3%9C%E7%BF%92%E7%A4%BE%EF%BC%88%E5%85%AD%EF%BC%89-9880)
本文由《men's uno》授權報導，未經同意禁止轉載。